THE MYSTERY MARIPOSA

Pa pisgupuguasi pugteulgigtug pa wijei newt sinew pipuaqan metetag, gegnuategeg tanig pilueg pileg pettepultijig tan pilei militaten papuaqan. The Mystery Mariposa na maw glulg nepataqanaei papuaqan militamg gmtgig. Jel pas’g gis’apjasin tapusijig lasgug’g natel je sis mesgig papuaqan. 

“Paqaloqon ula a? The Mystery Mariposa… Jing’jaqali gisna natgoqei muta teltetm nin etlpuitegei!” 

Jingjaqal’g Margo ugtlmaqan. 

“Ow! Mu na getu tlategew’ap.” Pa gitg wesgeweieg. 

Margot ujjl mu piam saq pogji alatipnig maw nujotegelitl papuaqanigtug, muta ula na ugjit wejieimap tet amgweseweieg. Ula na papuaqan telas’g stige ula. Tes newtipungeg, tapuisgegsijig jel nan maljewejg eginamasultijig wejitajig tan telgig ula gmtgi na megnujig ugjit militanei tes newtipungeg Mystery Mariposa’ewei papuaqan. Apjiw gatu a, ula eginamasultijig na gegnui-mgnujig tan telinqaseg gis wigmitij gelulg gnuataqanei ugjit negmowei elmategemgewei esgmatas’g. Gatu ula newtipug, nin aq Margot mu na natpiltuweiw’g ut. E’e, tan tujiw gejij tanuwen elapuguen ula etlugwemg. 

Tanig militajig tepitajig tan mawimgotig pugtewulg pittaqapesig Marina Del Rey’eg. Newtejit na milasit stige tanuwen nepatm aq gisalsit al’loqoiet msaqtaqtug pugtewulgigtug, tan etliesgmat wejugsin tanig ula etl’militajig. Muna wen telimam’g goqwei, aq mu giasgiw’ewei ‘gplutaqan ula etlmilitamg: gwilen ugtinin tmg aq toqojiw angitasuaqann tan apoqonmuetal. 

Natami nesisgegsijig je asugom gisitaqaneq tep’pultijig ula pugtewulg, tampas’g wen gisi negmitew nut’nepateget. Pewalulg na gisiglulan tampas’g “tep’pultijig” ugjit apoqonmuetal, gatu esgmaten gis jiglalugsin ‘gwejitaqanm maw tanuwen “nujnepateget” tan telipgwiluasin tan goqwei wejitun. Aq amujpa angotm gil mu gisgulm’g muta pas’g newtunmn newt pesgmn tanuwen nut’nepateget aq gil oplitasin, na gil mentol’g. 
Gatu tlia tan telimtuweg ula militamg ugjit gaqamutatimg, The Mystery Mariposa ‘apjiw gisiatl tanuwen mawi’as’susit. Maw tliag giasgiw tan tujiw gil mawolj aq agasewalj tapuisgegsijig jel nan tesijig maljewejg eginamasultijig geget tewaqipunoltijig aq mawoluj ugjit mawintutinew mst. 

O, e’e, gis telimulas tan goqwei mesgig wet’temn? Tanuwen wet’teget etlmilasit ejiglait maw mesgig suliewei stige tapuisgag pituiptn’naqan tesisgegaigl, tan apjiw eliag ginamuoguomg gisna natami tan l’gowaqanei apoqonmas’g. 
Panuijotm na nigantug ula pugtewulg, tan pugwelamgig tanig militajig ges geg’gunm panteteg gaqan ugjit nin. Pa mst negmow etliangamatitl aq gesiangamatitl ula tan nutewistlitl ges etlgitgl ilsutegegl ula militamg. Aq pana eluwewigl. Pa mnaq nin meniagig teli-mus’soltijig maljewej’g eginamasultijig mst eimutijig newte wijei etlmawiatij. 

Je gis telotm nt’tlaminu wiguoteget angitetm. Etug nin etl’egsupugualsias? Teltasias nin gisi wisuwegnimas ula mst tapusgegsijig je sist tesijig algwiluasultijig, atn’naqaneg, atugwewinug nujwigegewinug maljewejg? Aq Margot, negm na gesatgl wigatignn tan nepategej wen ugjit pas’g “papin”? 

Je gis simtug, jijuej’g tapuewei metetag, tan telueg pogtamgiag. 

Wegwi, Nisgam. Nin teltasi. Etl jistmas ula? 

Pa mst eginamewinug gutatesingig mesgig asei tan eimutipnig igtigig altejalugewinug etli’esgmtijig peitaieg. Ignmugsiegp ’newtej wigatigneiej aq ewigigemgewei aq ula gisi ewmn stige wasoqonaqan. Tan nujiwistog telimugsieg, ula na wigatigneiejl ugjit na gil goqwi geto wigmn gilewei pas’g. Newte mawgig Mariposa’ewei ‘gplutaqan na, mu gil teltenug mawtemn tan goqwei gil giswejitun goqwei, glaman ula ignmulg’p wigatigneiej etna natel goqwei gil ewigmn goqwei tan wejitut’p. 
Pugwelgig eginamasultijig togjuwitajig mujga gegweg gptag pugtewulgigtug aq pugwelgig nisitajig epuneg elg. Ges angaptm tesipunqeg ula neiatas’g, nin geitu ula tanig militajig negow pewatmitij tan wentagteg aq getlewei eitnug tan nmitug ula pugtewigtug gptag. Pa nin simtug wesuatu aq gwiluasi tan me mnaq wen wejiegw gwiluasimg, tes igtigig mimajuinug altaqitajig esgwiejig algwilmitij npuinu waqei.

Miguaptm ala gejigiag wigunapu’ei eteg, je suel aquteg ugtejg lgosuaqanigtug, gegweg elasgmig. Je tepi aquteg ugjit mu wen miguaptmn, gatu mu tepiaqutenug wegow natuwen nmitun tan miguapt’tew. 
Pisgulgai nin gaqanigtug. Megwegl mgegnel mutputil, patawtij ugjit wigunapu, wigatignei geguteg. Pas’g nin tan eim newtugwamsi, gatu mu newtugwalugwei. Napuigigegl esptegl tan nemuj wen elsaqas’g, tlaman mst goqwei nemitog tan telmilialasi. 

Simtug ewigm tan wigatignn geguteg tlaman etugjel tlimitew natgoqwei eteg ugtejg tan migwimitew me tlgneg. Aq na tujiw miguaptm. Mawiapjejijg wigatignjij neiasgmig tan mawi ugtejgewei, neiateg aq geitun neget na mawiapjeijg tan tes’g geguteg. 

Wigwitasi. Angitasi. Ula na mawiapjejijg… etugjel nat goqwei etl tlimig? 

Elipi tan eteg wigatignn elogtas’g mgnm wigatign aq pananqotasi. 

Sigueg. A mu etug. Tal menuegen wigatign mu goqwei etenug? 

Na apajigatu ula wigatign elogtas’g aq siawasi tan pemliap. 

*** 

Gis nige inewtisgagal jel asugom tesiajetl pit’temeg. Je nigei mimajuinug pogji gispntijig. Mst nemigig ugsisgual tan telgispntijig muta ugsisgug ewigas’g pemtesgaqig, gen’nmititl wigatignn tan goqwei wejitutip.
Npuwinuei waqei wejitapsg’ geljistaqanogigtug ugtejg etlwissugutimg pugtewulgigtug. Asgoteget, geitu. Gatu mu na ‘gjitmei geljistaqanog. Talma mu na ‘gitmei tan tel glt’g goqwei, tlaman tanuwen etlmilasit nepot etugjel npsog giasgiw tes etliesgmet tanuwenn wejigun tlapis. 

Gis nigei tujiw, pugwelgl gnuataqann neiatesgl. Jel wasoqwataqan melgitas’g natu wen’ewei wejitas’g npuinuwei waqeg, tan natami nesisgegipunap jinm. Wigatign gesaltimgewei moqo wigas’g maw natuwen ug’wisunm meninatas’g epunegel. Ag putai npisun nepategeg mimgwatasit ugtejg pugwelg npisuneg putaig tan nepitegewinug eimutijig. 

Etlitetm alt mimajuinug tan negmow mentotpnig etlitelmatipnn nepitegewinul, muta ula npisun nepateget tan masgutegep wesam mesuteg’p. etna na ugjit mu geitu wenaqiewap goqwei aq tluwen negmitp na. Je piam, ula wasoqwataqan aq wigatign gesaltimgewei mu nim wijei wijetigupnn lpa, ugjit nepategewinu gis tlategen. 

*** 

Je gis nige gisqatatpag aq amujpa giasgiw telimul, nin pas’g getu apsgwasi nnpoqon’eg tan etlmaqatui tan elsin aq pas’g getunpai. Natami newtisgegsijig je ugmuljim mijit esgweijig tan etl’militatag pel nigei, naqanmaseg nin gis nmitun mijit newte nagweg pmiatew tan militamg. Me wejotmitij aq tepjignmitij amalatalmgewei patawti pugtewulgigtug gatu mimajuinu ma pas’g gisitlataltew esgtmgewel maw pipnaqan aq mo nim gisinpagw wen.
Ntun pa samqwaniag tan tujiw angitetm tan Margot telimip gesgmnag tepasiwaneg ula pugtewulgigtug. Wettegen gisna entun, gitg elatigw tan newtitpag panteteg magasanjij gagmilatigw. Maw wigapugul aq mujgajewel pog’gwitewel mlagejuatasgl eltutitl. 

Pisgwai epuneg mijanoguomg aq iltatu gaqan. Tan newt’tnemig tan mu etenugul tan napuigultem tan eimn. Je welas’g gisigsuwatun atlasming ijga muta teligsase’gl wasoqonmaqann pugtewulgel. Naqasuatuann na wasoqonmaqann aq ignmatm nunmaten ijga mena na wasesetew mijanoguom. 

Plujaqamati angaptm aq wetjelami pa. Teltetm etugjel ula Mariposa’ewei wasamiespitetas’g. Telimul a, wen etug getu eig natami tan mst wen nmigu’tal maw mogpegl ugpugul aq tluweness wissei etlgweg gusapun’g? 
Pa jiniw wenaqal’g ewgigemgewei, aw genn’g nt’tugwapegngel etli’angitasi. Guntew sigtimgotig, npisun melgignag a nepategeg. Click, click, click. 

Ula ewigigemgewei wasoqwasit. Wasoqonmaganjij wiagteg ugjit gisialasenman mst tami pegn’g, aq etugjel algwiluasin gujmugel pugtewulgigtug tan tujiw pisi pisgiag. Ugtejg oqolumgwasi mena gisi ilegas ula tan etlmetgweg njitaqan. 
Aq na tujiw migwaptm. Natgoqwei ewigas’g g’ptai. Tetuji gispnei pa, pe telotmann npugugl etlmaligeiwigl tan telnemitegei. 

Sangew gennm wasoqonmaqan mena ulnmit’tes tan teltasi npugugl nemitogl. Gwe. 

Gwe? 

Ap’ta talamug neget gnuataqan ut ula?

Gisna etugjel mu na gnuataqan pa. Etugjel ula gnuataqan me mesgig aq tan etltluweg pa. 

Ula ewigigemgewei mu na wasoqonmaqan. Nummaseg na pas’g. 

Jipaqatesin pa. wen ap geitog ula? Algimwigasgl glusuaqanjijl mst tami ula pugtewulg? Aq goqwei na ajipiltueg mimajuinu wejitun goqwei apjej’g aq wejitun ula glusauaqan Gwe? 

Pogji migwitetm tan wejituap ula maqtaweg wigatignjij tan wigunapun etlaputeg’p. Pa teltetmap na tujiw pisuiw ula tan tel’lugwei pa mu talitasiap goqwei. Gatu nigei pas’g neget gisi angitetm nunjig piteg. 

Sangew tewaq’qasi mijanoguomg epuneg aq gegweg elipi simtug, je wejotm mu gisi matapewin wegwipgwatu. Je weliaq ula gptai mu nimtalianug tan mu wen eimug pasg tan eteg wen gisamqwatew patawti, muta mu najipiltuwegtnuisog aq tan nin getutlategei nige ula tet. 

Amujpa getlewei pantenm nt’awti, simtug naqasuwetestuann wasoqonmaqann aq wessuwegei ula maqtaweg wigatignjij ula tan geguteg’p. 

Ge gil a. ula na wigatignjij mu na pas’g goqwei. Tami eteg ula aligasig glusuaqan? 

Na elasenmai wasoqonmaqanjij tlapis wejitu tan goqwei algwilm. Pa wijei ula glusuaqanjij tan ewigas’gp mawi amgwesewei gesaltimgewei wigatign, ula tet nipi l’luigneg tesisgag jel tapu. Teltetm ula gngwas’g teluweg natgoqwei, gatu me mnag pegisinu tan tet tami telteg tan etegl gnuataqann. Pas’g elitasi tan nin ngamlamun telgwitg. 

Nitapjij, Ula gimialas’g glusuaqan geget eluwewalig pa. Pa mu geitu tan telipg’ijigsuwat’s ula tan tel’lugwei. Marin telimit nin wesam nsanoqonig, aq pa nepeitew enmiag ‘gjitug goqwei. Pa mu geitu tan tlategas pa nugu. Ula nagtm ula wigatignjij tan wiganapu eteg muta pugwelg asuset natel maw mst wen, tan ula l’luingneg tesisgagewei jel tapuewei nipij, muta na tes ajiejit’p wesuwatog wegow nin wejitu wegow nin geitu gesalul. 

Anabelle 

Anabelle! Nin weltesgaqap amgweseweieg. Alwijetipnig ugjinmuml. Piel. Aq Marin na maw witapegaltijig negmow. Etug jel telu et na Piel na negm nutnepateget? Marin negm altluwep negm elg gisi nepategetew elg. 

Gisna Marin wejotg gisigalan witapal Pielal ugjit nepogsin awna negm? 

Gina Anabelle, negm nagt’g ula ewigas’g wigatignjij ugtejg ugjit gisguan natuwenn smatewilitl wejitun tan telugweg ula wasoqonmaqanjij? 

Ula na tet nigei, teltetm nin geg’gunm gelulg awti panteteg ugjit nin tetaputmn giasgiw. Je me ap me gelulg geggunm mst ug’t temn pa mst goqwei. 

Eltugwim simtug nigantug pugtewulg, sigti ulgwijin pa muta geggunm natgoqwei tetapute’mn maw pugtewulg wejuag maw ula maljewejg eginamasultijig. Tlapis gisiwt’tegei natgowei ula elawsi. 

Pemtesgaqig metlasisgegsijig je tapu etlmilitajig tanig gaqamultijig stige pa npuinug mu taligtapsunultigw. Je teleiag nemig Margot tan gisiwegwapi pmetug ninen, gatu nin wesam tetagitasi je naqasin ugjit negm. Amuj teltasi nin etug eluwewiei pa. Algwilm nin tan gisipun-milasias ula tan eltmilitamg. 

Amuj teltasit nin sigtipuatmann ala pog’gwitel mlagejueiel je etug nige. 

Newt gisituwaneg pugtewulgewel gaqann nigantug, weltesguimg maw unjigewaj nutewistog pugtewultimgewei maw pugwelg nujinapuigigewinug. Nige wesam’messatesgmai ugjit nin apsgwasin. Newt na tewien ula gaqann, gil na etltluwen tan teltasin moqwa gisna gil amujpa punatun tan telmilasin. 

Ula gesasegl wasoqonmaqann tan wasoqotesgl nsisgug pa gisalig nemigig glogowej’g. Etugjel wesam mamuniangitasianeg ugjit punatun ula militamg simtug. Je mu geitu giasgiw pa nugu? Gis etug gisitasianeg tanuwem nujnepateget? Gisna ula tan teltasi aqataig aq aqataig nin ug’t’tegen gisalig piltuangitasin ntinneg? 

Pa je ula nutewistog elasgn’g tan etlglusimg ntun’g, etli’esgmatg angitasuaqan gisna glusuaqan giasgiw’ewei tan tluwas. Nat goqwei. 

“Anabelle?” 

O, Nisgam. Awna getu tluwap Piel a. Anabelle? Goqwei gisalug’s nin tluwen aq Anabelle awna witan? 

Pa simtug pastes’gl aq pa gutajuigl wigatigneijgl g’ptag wejiagal aq nunjig gutatesgl mst tami. 

Wettegei. Wet’tegeianeg ula Mystery Mariposa’ewei aq wet’tem tapuisgag pituiptnnaqanaigl tesisgegaigl. 

Wegla pogwitel mlagejuieiel sigti wigapugt’tal pa nige wejategemg.