Quentin Condo

Ula ewigigl glusuaqann rappel ignmat’p panteteg gaqan tlaman gisiglusitew giasgiw, ugsitun nut’mugsin, nutugsin maw igtigig, aq matn’mn nnu mimajuinug menaqajewelmual. Aq negm wiaqiep maw mimajuinug neiasultinew aq elegep tapugul newtipungegl stige nujilsutaqatijig Gesgapegiag. Gatu Quentin nemitoqop gpnolewuti, aq gpnolewei goqwei tan megwaspip mu nugu tleiawigup maw negm. Simtug menwigusip maw gpnolewuti aq nige wigit pilueg seg aq nnuegatig.
 

Etligweg giwnaqa Pastungewagig, Quentin wejitoqop Hip-Hop gesgmnaq mesgig’tnugeg tan telignag natami 2000’eg. Atugwanaqanei hip-hop, maw tan wesgut’g tan telsasewas’g mimajuaqan aq melgigna’tas’g, neget na gesmogjal’tp wejitog, aq Quentin nemitoqopnn awtil wijel elatigl maw nnuei’el aq maw Pastungewag antaguejg utanjijl. Tan mawigjitog amgwesewei ug’sugwejotaqan ugjit tan telmimajimg nnuewei, Quentin wejitogop simtug aq tan mawignag telgamigsin ugjit negm tan etl’gwilg’p ugjit hip-hop, Ugjit musgatun tan telignag weltag, migwitet’g tan telgis mu nim migwitetasnugul glusuaqann tan tujiw nujitpluteget wesgut’gl, pas’g gatu a, tan tujiw milpipugwen stige ula rap me gneg’g naqamaseg ugjit me naqsi’migwitet’tes.

Mujga amgweseweieg, Quentin getu sesatoqop tan goqwei maw megitet’g ugjit hip-hop ugt’nnuegatimg. Gatu ujjl mu welte’t’mligup na tujiw. Gatu nige mu naqalulugup Quentin ugjit eimn neialsin rap, tlia tluweg amujpa mimgwasin aq mlgignatun tan goqwei gesat’g maw witapa, etl ginamatimg. Quentin ngutei sigtigsat’g “breakdance’’ ula na amalgewaqan tan mawimgitetas’g maw maljewejg nnuegatig. 2018’eg, Quentin tewalapnn amgwesewel eptaqann weltagewel, Rez Life, tan pilei wisun teluitusip nige wejategemg, Q052.

Tan tel’gisitetasit eptaqan weltaqewel na natuwen papuaqan tluwes wes’g’titijeg newt tog. Quentin siawtluwet tan tetujigsat’g wes’gtimg, neget na tog ug’gamlamun miaweg tan telnmitog goqwei aq mimajuaqan telin’s’tasg aq tan telotmug. Tes newte pugwei wesg’timg gis nmitun tan telmili’angitetasg lgowaqan: sesatun ginamasuti, mawlugwen maw maqamigew, gisilugwen aq apoqonmatmn tan eimutigw, maqamigew, eltunl tan migwite’tes, aq ap eta elgwatm goqwei tan miguatas’g gisna moqwa.

Wesgemg na gisalj migwitelman ujjl Quentin aq tan telimgotig sesatun goqwei. Tan tujiw g’jitm angitetm, wesgemg na amgwes sagawegig nnugig neiataj gepmite’tm. “Amujpa angitelmt tan telgig ula plamu tan telimaj wis’sugwatasit. Ma gil gisi’angitetmun newtugwalugen newtej nagweg ma nugu imug plamu gisgug.” Teluwet Quentin. Wiaqatog tan goqwei megotig ugjit wesgemg tan tel’lugwej, aq ap siaw gen’nm maw maqamigew tel’mimajig.

Aq weltag sig’stm? Neget na pejiag ugpugnamaqan ugjit mat’tnaq’en ugjit Nnug ug’plutaqanmuoml. Quentin ujjl neget ewagp tan tujiw i-saqamawijeg. Gatu Quentin piluei awti ewgp aq tan telteg aq eta ug’gamlamun wejuag aq gisgajeg goqwei wejgwiputeg. Quentin ujjl npapigwatug tan weltag welapetas’g, gatu militaqan neget gisi’sasewat’tew mimajuaqan. Gisgug, Quentin melglugwet gwilgl glusuqann ugjit ug’tapegiaqanml, aq sasewatog tan goqwei megotig aq ginamasuti maw unjang maw weltag nutas’g, aq najiwsgen tan tujiw pegwatog aq mu tal’lugweg.