Pierre« Ti-Basse » St-Onge

Utshu Ti-Basse anite Baie-Comeau ka-takuanua mak ne meshkanau Tibasse anite Masseku-kapatakanit, atut tshipa takuannipani nenua eka natshishkatutakuenat ue Innu Pierre « Ti-Basse » St-Onge mak nenua Upashtuneunnua Robert R. McCormick. Anite ut tshitshipanipan 16 uashtessiu-pishimu 1915, ue McCormick etenitak tshetshi natshi-uapatak minashkuanu ute Tshiuetinit. Pimishkapan anite rivière aux Rochers eshinikatenit ashit utishkuema Amy Irwin mak nishu katshissinutaieniti.

Tepishkanit mak anite e minashkuanit, shash utitshipanipan tshetshi manukashuht. Ashit nenua e nishuniti katshissinutaieniti, McCormick ekue issishuet tshetshi katakushish minuat tshitutet, muku ekue nakaukuht tshetshi shaputuepaniht usham e mishta-tshishkueienitakuannit. Apu tshi mishkahk umeshkanamuau kau tshetshi tshiueht anite uetuteht mak apu ishpish ut tshitutaht mitshiminu.

Tsheshu ka ashu-minakanit eshinniunannut nutshimit, Pierre « Ti-Basse » St-Onge e nataut mak e kusset ishinniuipan. Shash anite tapan minashkuat uenua McCormick kueshpiniti mak nenua e nishiniti katshissinutaieniti. Natshi-tshishpeuatiku, miam mekuat e neshtunikuht katshishkueienitakuannit. Ti-Basse ekue pitukaiat nenu tepishkanit anite utakuakutshuapit, ekue miniat nipishapunu, shishipa mak anite e tshishitenit tshetshi taniti. Uipat tshietshishepaushiniti, itutaieu anite tshe eka animauniti. McCormick eshi-uapamat Ti-Basse, eukuan ka minushit katshissinutaiet nutshimit.

Tshetshi nashkumat katshi ushumuikut, uishameu tshetshi natshi-mupiniti anite Chicago Upashtuneu-assit, anite ka unashinataukut kapeshaitsheniti. Eshi-natuenitak Ti-Basse, McCormick ekue issishuet tshetshi nanitam itishaimuat mitshiminu mak ashinia. Ishpish minupannit nenu ka natshishkatuht e mishta-tshishkueienitakuannit, ekute ka utshipannit tshetshi minu-uitsheuakanitatuht. Uitsheuakanitatun ka takuak, tapishku e ishpitenimituht. Ti-Basse utakunakana ekue nanitam taniti anite nenua napeua umashinaikanitshuapinnit nuash e nipit 1955 pipunnu.

Iapit kie eukuan ka tshimatakanit pakupeutshikan iapit utishinikashun e apashtakannit anite Shelter Bay utenat. Ti-Basse minu-nishtuapatamupan minashkuat mak anite auennua eshi-taniti. Kamishta-pamishkat rivière aux Rochers, uesh ekute nanitam ka tashkamaik ashit eshi-tshinuetaminiti St-Onge.

Minu-kakataku itutepan tshetshi atauet ka ishpish napatatshet, ushakama. Ishpish mishanit utshissenitamun, uanasse tshipa tshi tshissinutaiepan katipaitsheniti. Ti-Basse ekute ka ut nishtuapamat Paul Provencher, kupaniesha anite McCormick utatusseutshuapinnit. Peikuau, Ti-Basse mashkatenimiku Paul Provencher uatamuat eshpishanit minashkuanu anite rivière aux Rochers tshetshi ut minu-tshitapataminiti tanite eshi-taniti aueshisha.

Pierre « Ti-Basse » St-Onge eka enniut 1943 pipunnu anite Shelter Bay. Eukuan ka mishta-nishtuapamakanit anite nenu assinu. Nukuannu kie utishinikashun anite ashtamitat atusseutshuapit mashinaikanuian ka tutakanit anite Baie-Comeau. Eshku kashikanit kanuenimakannu utakunakana mak mishituepaniakannua anite mamu katananut tipatshimunit Tshiuetinit. Mitshet ussima mak utanishkutapana tanua anite innit tshiuetinit Uashat mak Mani-utenam.