Loretta Robinson

1981 ᑲ ᐃᑎᔅᑕᔨᒡ ᐱᐳᓂᔪᐤ ᒋ ᐃᔪᐤ ᓄᐛᑕ ᕈᐱᓐᓯᓐ ᐊᓐᑕ ᓴᐱᐸᐤ, ᒥᒋᒪ ᑲᐛᐛᒋᑭᒪᔅᒡ ᐃᑕᐅᓂᔪᐤ᙮ ᑭᔭ ᐊᑯᑕ ᑲ ᓂᑕᐅᒋᑦ ᐊᑕᔨᒋ ᐅᓂᒋᔨᒂ, ᑭᔭ ᐎᐧᑲᓂᓴ, ᑭᔭ ᒥᓯᐛ ᐊ ᐃᑕᑎᓯᔨᒋ ᐎᐧᑲᓂᓯᐛᐛ᙮ ᐃᔪᐛ ᒋᐛᑎᓄᒡ ᒪᓂᑐᐸ ᐅᒋ ᐅᒋᐱᔪᐛ ᐅᑕᐎᔭ, ᐊᑯ ᓇᔅᑲᐱ ᐃᔪᐛ ᐅᑲᐎᔪᐤ ᐊᓐᑕ ᑲᐛᐛᒋᑭᒪᔨᒡ ᐅᒋ᙮ ᐊᐛᓯᐅᑦ ᐅᒋ, ᓄᐛᑕ ᐅᓂᒋᐃᒂ ᒐ ᐊᓱ ᒥᔨᑯᐤ ᒋᔅᒐᔨᑎᒧᐅᓂᔪᐤ ᑭᔭ ᐃᔪᐤ ᐃᑐᐅᓂᔪᐤ ᓇᔅᑲᐱ ᑭᔭ ᐃᔪᐤ ᐊᔅᒋᔭ ᐅᒋ᙮ ᐊᓄᒡ ᒋᒋᐛ ᓂᓇᔅᑯᒧᐤ ᐊᓂᔭ ᑲ ᐃᓯ ᒋᔅᑯᑎᒧᐛᑭᓄᐅᑦ, ᑲ ᐛᐎᒋᔨᑯᑦ ᑕᓐ ᒐ ᐃᓯ ᐊᑐᔅᒐᑦ᙮

ᓴᐱᐸᐤ ᒋ ᐎᒍᐤ ᓄᐛᑕ ᕈᐱᓐᓯᓐ ᐸᑐᔅ ᑲᒋ ᒋᔅᑕᑦ ᑲᒋᔅᑯᑎᒧᐛᑭᓄᐅᑦ᙮ ᓇᓂᑎᒻ ᒋ ᒋᔅᒐᔨᑎᒻ ᒋᔅᑯᑎᒪᑐᐅᓂᔪᐤ ᒐᒋ ᑎᓯᐧᑲᒃ: ᒋᔅᑯᑎᒪᒐᔪᐛ ᐅᑕᐎᔭ, ᑭᔭ ᐊᐛᓯᔪᐅᑦ ᒋᒋᐛ ᒋᓴᒋᑕᐤ ᐊᒋᔅᑯᑎᒪᑐᓇᓄᐎᔨᒡ ᐊ ᐃᓯ ᒪᑐᐛᑦ᙮ ᐊᐛᓯᐅᑦ ᑲ ᐅᒋ ᐊᔨᒧᑎᒪᑯᑦ ᐅᓂᒋᐃᒂ ᐊᔅᐱᔅ ᒋᔅᑕᔨᑕᑯᓂᔨᒡ ᒋᔅᑯᑎᒪᑐᐅᓂᔪᐤ᙮ ᑲᒋ ᒋᔅᑕᑦ ᑲᒋᔅᑯᑎᒧᐛᑭᓄᐅᑦ, ᒋ ᒥᓯᓇᑕᐅᑎᓱᐤ ᒐᒋ ᒋᔅᑯᑎᒪᓱᑦ ᑕᑐᐎᔨᒡ ᒋᔅᑯᑎᒪᑐᐅᓂᔪᐤ ᐊᓐᑕ ᑲ ᒥᔅᑎ ᒋᔅᑯᑎᒪᑐᓇᓄᐎᔨᒡ CEGEP, ᐊᓐᑕ ᐛᓴᒡ᙮ ᒋᔅᒋᑐᒻ ᓂᔭᓂᑯᑎᓂ ᐊᒋ ᐊᔨᒥᓂᔨᒡ ᐊᓂᔭ ᐱᐳᓇ, ᒪᓯᐎ ᐛᔪᐤ ᐊᑎᑯᓂᔨᒡ ᐃᑕᐅᓂᔪᐤ ᐊᓐᑕ ᐛᒋᒡ᙮ ᒥᒄ ᓇᓂᑎᒻ ᒋᔅᒐᔨᑎᒻ ᑲᐤ ᒐᒋᐛᑦ ᐊᔅᒄ ᐊᓐᑕ ᐸᐃᒄ ᒋᓯᑲᐛ ᑭᔭ ᒐ ᐛᐎᒋᔨᐛᑦ ᐛᒥᔪᐱᑕᑭᓄᐎᔨᒡ ᐅᑦ ᐃᑕᐅᓄᐛᐤ᙮

ᐊᓂᑲᓄᔅᑲᒐᑦ, ᒋ ᐛᐸᑎᒻ ᓄᐛᑕ ᒐᒋ ᐛᐎᒋᔨᐛᑦ ᐅᑦ ᐃᑕᐅᓂᒡ᙮ ᓂᓱ ᒋ ᒋᔅᑕᐤ ᐊ ᒥᔅᑎ ᒋᔅᑯᑎᒧᐛᑭᓄᐅᑦ ᐊᓐᑕ Bishop’s ᑲ ᒥᔅᑎ ᒋᔅᑯᑎᒪᑐᓇᓄᐎᔨᒡ ᒐᒋ ᑲᔅᑎᓇᑦ ᑲᔪᐎᔭ, ᐊᒥᒪᑕᐅᓯᓇᔨᒐᓄᐎᒡ ᑭᔭ ᑲ ᐊᔭᐱᓯᓯᔨᒋ ᐊᐛᓴ ᐊᒋᔅᑯᑎᒧᐛᑭᓄᐎᒋ᙮ ᒋ ᑭᔅᒋᐅ ᑭᔭ ᒋ ᒥᔽᔨᑎᒻ ᐊᒋᔅᑯᑎᒧᐛᑭᓄᐅᑦ ᓇᔅᒡ ᑲ ᐅᔅᑯᐎᔨᑦ ᑭᔭ ᑲᑭᒐᑕᐛᔨᑕᐧᒃ: ᒋᒋᔅᑕᐤ ᐊᒋᔅᑯᑎᒧᐛᑭᓄᐅᑦ ᐊᓐᑕ ᑲ ᒥᔅᑎ ᒋᔅᑯᑎᒪᑐᓇᓄᐎᔨᒡ ᐊᑎᒥᔅᑯᐛᑭᓄᐅᑦ ᑭᔭ ᑲ ᒥᔭᑭᓄᐅᑦ ᑲ ᐃᓯ ᑲᓂᔪᐅᑦ᙮

ᑲᒋ ᒋᔅᑕᑦ ᐊ ᒥᔅᑎ ᒋᔅᑯᑎᒧᐛᑭᓄᐅᑦ, ᒂ ᒥᔅᑎ ᐃᓯ ᐛᐎᒋᔨᐛᑦ ᐊᓐᑕ ᐊᔭᒥᐅᔨᒋ ᐃᔪᔎᐛ ᑭᔭ ᐊ ᐃᔨᒥᔅᑎᒪᒐᑦ ᒐᒋ ᐱᒥᐱᔨᒡ ᐃᔪᐤ ᒋᔅᑯᑎᒪᑐᐅᓂᔪᐤ᙮ ᒋ ᒪᒥᑐᓇᔨᑎᒥᔨᑯᐤ ᐅᑦ ᐃᑕᐅᓄᐛᐤ, ᑭᔭ ᒂ ᑭᒂᒋᒥᑎᓱᑦ ᑭᒂᒋᒐᒧᐅᓇ᙮ “ᑕᓐᑕ ᓂᐸ ᐅᒋ ᑕᐱᑕᐛᓐ ᐊ ᐃᓯ ᒋᔅᑯᑎᒧᒂᐤ ᐊᐛᓯᒡ ᐊᓐᑕ ᓇᔅᑲᐱ ᐃᔪᐤ ᐃᔨᑐᐅᓂᒡ ?” ᑲᒋ ᐸᐃᑯᐳᓂᔨᒡ ᐊᒋᔅᑯᑎᒪᒐᑦ ᐊᓐᑕ ᐅᑦ ᐃᑕᐅᓄᐛᒡ, ᒋ ᒪᒥᑐᓇᔨᑎᒻ ᑲᐤ ᒐᒋ ᐃᑐᑕᑦ Bishop’s ᑲ ᒥᔅᑎ ᒋᔅᑯᑎᒪᑐᓇᓄᐎᔨᒡ ᒐᒋ ᐊᑎᑐᐤ ᒋᔅᑯᑎᒪᑎᓱᑦ᙮

ᓇᔅᑲᐱ ᐊ ᐃᓯ ᐱᒪᑎᓯᔨᒋ ᑭᔭ ᐊ ᐃᔅᐱᔨᒡ ᒥᓯᑕᔅᑭᒥᒡ ᑭᔭ ᑯᐸᒃ ᒋᔅᑯᑎᒪᑐᐅᓂᔪᐤ ᐊ ᐃᓯ ᐱᒥᐱᔨᒡ ᒋ ᒋᑕᐸᑎᒻ ᑲ ᑐᑕᐧᒃ ᒥᓯᓇᐃᑭᓂᔪᐤ ᑲ ᒥᔅᑎ ᒋᔅᑯᑎᒧᐛᑭᓄᐅᑦ᙮ ᐊ ᐃᑎᔅᑕᔨᒋ ᐎᓱᐛᐅᓇ ᑭᔭ ᐛᒥᔅᑎᑯᓯᐤ ᑭᔭ ᑲᑭᔭᓴᐤ ᐃᔨᒧᐅᓂᔪᐤ ᐊ ᐊᐱᒋᑕᑭᓄᐎᔨᒡ, ᓂᔭᓂᑯᑎᓂᔾ ᐊᔨᒥᑯᐅᒡ ᓇᔅᑲᐱ ᐅᔅᑎᓂᒍᐅᒡ ᒐᒋ ᐊᐱᒋᑕᒡ ᐅᔭ ᐊ ᐃᓯ ᒋᔅᑯᑎᒪᑐᓇᓄᐎᔨᒡ᙮

ᐊᓂᓱᔅᑎᒂᔨᒋ ᐊᐱᒋᑕᐤ ᓄᐛᑕ ᒐᒋ ᒥᓯᓇᑕᐊᐧᒃ ᑕᓐ ᒋᒋᐛ ᒐ ᐃᑎᑦ ᐊ ᐃᓯ ᐊᑐᔅᒐᑦ᙮ ᓂᑎᒥᒡ ᓯᐱᒡ ᐊᐅᑯᓐ ᒧᔭᒻ ᐊ ᐃᓯᓇᒂᒡ ᑲᒋᔅᑯᑎᒧᐛᑭᓄᐅᒡ ᐊᒋᔅᑯᑎᒪᓱᒡ ᐊᓯᒡ ᐃᔪᐛ ᐊᓐᑕ ᐅᑦ ᐃᑕᐅᓄᐛᒡ, ᑭᔭ ᐊᐎ ᒋᔅᒐᔨᑕᒡ ᐅᑦ ᐊᔅᒋᐛᐤ, ᑭᔭ ᐊᓐᑕ ᓄᒋᒥᒡ, ᑭᔭ ᐊᔅᒋᔪᐤ ᑭᔭ ᓂᐱᔪᐤ᙮ ᒋᑭ ᒋᔅᒐᔨᑎᒧᒡ ᑲᒋᔅᑯᑎᒧᐛᑭᓄᐅᒡ ᐅᑕᐃᐛᒡ ᑭᔭ ᐅᑦ ᐊᒐᐧᑯᐛᒡ ᐅᒋ ᑕᓐ ᐊᔅᐱᔅ ᓂᑐᐛᔨᑕᑯᓂᔨᒡ ᐅᑦ ᐃᔪᐤ ᐃᔨᑐᐅᓄᐛᐤ ᒐᒋ ᐅᒋ ᒋᔅᒐᔨᑕᒡ ᐊᔅᒋᔪᐤ ᑭᔭ ᓂᐱᔪᐤ᙮ ᐊᔅᒋᔾ, ᒧᔭᒻ ᐃᔭᐱᒡ ᐊ ᐃᓯ ᒋᔅᒐᔨᑕᑭᓄᐅᒡ ᐅᑲᐎᒪᐤ ᐊᔅᒋᔾ, ᐊᐅᑯᔪᐤ ᒪᔪᓇᑯᔨᑯᑦ ᒥᓯᐛ ᐊᐛᔅ; ᐊᐅᑯᔪᐤ ᐊᑐᑕᑯᑦ ᒐ ᐊᑲ ᑎᐸᓂᐱᔨᑦ ᐊᐛᔅ; ᑭᔭ ᒥᓯᐛ ᐊᐛᔅ ᒐᒋ ᒋᔅᑕᔨᑕᑯᓯᑦ᙮

ᐊᓐᑕ ᓄᒋᒥᒡ, ᒋᑦ ᐃᔨᒥᓇᓐ ᑭᔭ ᒋ ᒪᒥᑐᓇᔨᑕᓇᓐ ᑭᔭ ᒋ ᐎᒐᐅᑐᓇᓄᐤ ᓇᔅᑲᐱ ᐃᔪᐤ ᐃᔨᒧᐅᓂᒡ᙮ ᐊᓇᒡ ᓯᐱᓯᐅᐤ ᐊᐅᑯᔪᐤ ᑎᐸᔨᒋᒐᐅᓇ, ᑭᔭ ᐃᑎᓱᐛᐅᓇ ᑭᔭ ᑯᑎᑲ ᐃᔨᒧᐅᓇ ᐊ ᐊᑲ ᓂᔅᑐᑕᒡ ᓇᔅᑲᐱ ᐃᔪᒡ᙮ ᓄᑕᐱᔪᐤ ᐊ ᐃᓯ ᑕᐱᑎᒡ ᐊᑐᑕᒐᒡ ᒋᒋᐛ ᐊᔨᒪᒡ ᒐᒋ ᐱᒥᐱᔨᓇᓄᐅᒡ ᐅ ᓂᓱ ᓯᐱᔅ᙮ ᑕᑈᑕᑎᓱᐤ ᓄᐛᑕ ᐊᐛᓴ ᑭᔭ ᐅᔅᑎᓂᒍᐛ ᒐᒋ ᑭᔅᒋᔪᔨᒋ ᐊᐱᒥᐱᔨᒋ ᑎᐱᔨᐛ ᐅᓯᐱᓯᒥᐅᐤ, ᒐᒋ ᑲᐤ ᑲᔅᑎᓂᒥᔨᒋ ᑕᓐ ᐊᓂᔭ ᑲ ᐃᓯ ᐅᓂᑎᓂᔨᒡ᙮

ᐃᔅᐱ ᑲᐤ ᑲᒋᐛᑦ ᐅᑦ ᐃᑕᐅᓄᐛᒡ, ᒋ ᓴᐳᑐᐛᐱᔪᐤ ᓄᐛᑕ ᕈᐱᓐᓯᓐ ᐊᐛᐎᑎᒪᒐᑦ ᐅᒋᔅᒐᔨᑎᒧᐅᓐ ᒧᔭᒻ ᐊᒋᔅᑯᑎᒪᒐᑦ ᑭᔭ ᐊᐛᐎᒋᐊᐅᓯᑦ ᒋᔅᑯᑎᒪᑐᐅᓂᒡ᙮ 2018 ᑲ ᐃᑎᔅᑕᔨᒡ ᐱᐳᓂᔪᐤ, ᒋᐱᔅᑎᓂᒻ ᒥᓯᓇᐃᑭᓂᔪᐤ ᐊᓂᑐᐛᔨᑕᐧᒃ ᑭᔭ ᒋᒥᓯᓇᑕᐊᒻ ᒐᒂᔪᐤ ᑕᓐ ᒋᐸ ᐃᓯ ᐊᐱᑎᓂᔪᐤ ᐊᓐᑕ ᑯᐸᒃ ᒋᔅᑯᑎᒪᑐᐅᓂᒡ᙮ ᑭᔅᒋᐅᓐ 15; ᐊ ᐃᔅᐱᑕᔨᑕᑭᓄᐅᒡ ᑭᔭ ᐊ ᒋᔅᑕᔨᑕᑯᑕᑭᓄᐅᒡ ᐃᔪᐤ ᒋᔅᑯᑎᒪᑐᐅᓐ, ᐃᔪᐤ ᐃᔨᑐᐅᓇ ᑭᔭ ᑲ ᐸᒋ ᐃᔅᐱᔨᓇᓄᐅᒡ ᓴᔅ ᒋ ᐅᑎᓇᑭᓄᐅᐛ ᐊᓐᑕ ᒥᒐᑦ ᒋᔅᑯᑎᒪᑕᐅᒋᐛᐱᒡ ᑭᔭ ᑲ ᒥᔅᑎ ᒋᔅᑯᑎᒪᑐᓇᓄᐅᒋ᙮

ᓇᒥᔭᔪᐤ ᒥᒄ ᐅᔅᑎᓂᒍᐛ ᐛᒋ ᐊᑐᔅᒐᒪᑦ ᓄᐛᑕ; ᐃᔭᐱᒡ ᒋᔅᑯᑎᒧᐛᐤ ᑲᒋᔅᑯᑎᒪᒐᓯᔨᒋ ᒐᒋ ᐛᐎᒋᐊᔨᒋ ᐃᔪᐤ ᑲᒋᔅᑯᑎᒧᐛᑭᓄᓯᔨᒋ ᑕᓐ ᐊᓂᔭ ᐛ ᐃᓯ ᐛᐎᒋᔨᑯᓯᔨᒋ᙮ ᓂᔭᓂᑯᑎᓂᔾ ᐃᔭᐱᒡ ᒋ ᐎᓴᒪᑭᓄᐅᐤ ᐊᓐᑕ ᑲᒪᒧᐎᓇᓄᐎᔨᒋ ᒐᒋ ᓂᔎᐛᓯᔨᐛᑦ ᐊᑭᒂᒋᒐᒧᓇᓄᐎᔨᒡ ᑕᓐ ᐊᔅᐱᔅ ᒋᔅᑕᔨᑕᑯᓂᔨᒡ ᐊᒋᔅᑯᑎᒧᐛᑭᓄᐎᔨᒋ ᐃᔪᐤ ᐅᔅᑎᓂᒍᐛ᙮ ᐊᓯᒺᒄ ᐱᓯᒺ 2022, ᒋ ᒥᔨᑯᐤ ᑲᓂᔪᐅᓂᔪᐤ ᑯᐸᒃ ᐱᑐᐤ ᒋᓴᐅᒋᒪᐛ ᐅᒋ, ᐊᓂᔅᑐᐛᐱᒪᑭᓄᐅᑦ ᓇᔅᒡ ᐊ ᐅᔅᑯᐎᔅᑐᐛᑦ ᐃᔪᐛ ᐊᓐᑕ ᐅᑦ ᐃᑕᐅᓂᒡ ᑭᔭ ᑯᐸᒃ᙮

ᒥᓯᐛ ᒋ ᐎᒋᔅᒍᒥᑯᓇᐤ ᓄᐛᑕ, ᐊᑎᓱᐧᒄ ᒥᓴᒐ ᒐᒂᓐ ᒐ ᑐᑎᒪᐧᒄ, ᒋᒋᐛ ᒋᔅᑕᔨᑕᑯᓐ ᒋᑦ ᐃᔪᐤ ᐃᔨᑐᐅᓄᐤ ᓂᔅᑎᒻ ᒐ ᐎ ᐊᔅᑕᔭᐧᒄ᙮ ᒋᑭ ᐎ ᒋᔅᑕᔨᑕᓇᓄᐤ ᑕᓐᑕ ᐛᒋᔭᐧᒄ, ᐛᔅ ᒥᓯᐛ ᒋᔅᑕᔨᑕᑯᓇ ᑎᐸᒋᒧᐅᓇ᙮ ᐊᓂᔭ ᐊᑐᑕᐧᒃ ᒐᒋ ᐸᑐᐛᑭᓄᐅᑦ, ᓱᒋᑕᔭᔅᑯᐛ ᑯᑎᑲ ᐊᐛᔪᐛ ᓄᐛᑕ᙮ ᓇᒪ ᓂᑕ ᐅᓂᒋᔅᒋᑎᒻ ᐅᔭ ᐃᔨᒧᐅᓂᔪᐤ ᑲ ᒥᔨᑯᑦ ᒋᓴᔪᐛ: “ᐊᔨᒥᓐ ᐊᑐᔅᒐᐅᓐ, ᒥᒄ ᐊᑐᔅᒐᐅᓐ ᐊᐅᑯᓐ ᐃᔭᐱᑕᔨᑕᒂᒡ᙮” ᐊᐅᑯᔪᐤ ᐊᓂᔭ ᓴᒋᑕᔭᔅᑲᑯᑦ ᓄᐛᑕ ᒐᒋ ᓴᐳᑐᐛᐱᔨᑦ ᐊᓐᑕ ᐃᓯ ᓂᑲᓄᒡ᙮