Shayne Michael

Ntoliwis Shayne Michael. Wolastoq nil, nuceyaw Matawaskiyey Wolastoqey Skicinuwihkuk nit New Brunswick. Mesq natokehkimsiwan, nwikihpon skicinuwihkuk ‘ci oqomolcin kehsanku kehsikoton. Mate nkocicihtunewihpon tama nkotili; Nuci ‘ci-maciw Atawa tokiw Moncton tokiw Kepek Kci-uten. Esakiyuki naka pemokamok nisonul piyemitahatom elluhki. Toqiw nkisi qecehtunol, ‘saku nkiskehkims milomahtuwakon nit Espokehkitimok Moncton, naka esakiyuki naka yalokitom Laval Espokehkitimok. Mehci kisehtun bachelor’s degree neke 2015. Pemokay kehkitikon piyemi nil-kiskehkims, nil-yalokitom. Nkisuwehkanol nihtol likotonol weci yalsakiwi, weci tpinom naka kehkimsi. On ehta nkisi atolahsim, on ehta, mace wikhikan amsqahs, naka nowihqaculkun ekisi amsqahs ote. Neke Wihkewi-kisuhs 2020, nkisi nutepunomon amsqahsewey wikhikon ‘ci amalhewestuwey, Fif naka sauvage, wiciw les Editions Perce-Neige. Mat Ntolitahasihqopon nutepunomon oc wikhikon mesq tehsahqesiw ihtolosakiyamok!

Siqon sesomitahamqot
Kisuhs wolihposomonol ntolitahasuwakonol
Wocawson nkisehtakun nsiktelomin
Psiw-ote tama milimahte
Elimahtek pesqahsuwehskil sankewiya nwopon
Komiwon
Kisuhs minuwawsuwiw
Pesqahsuwehskil kotowosmuwiwol
Wocawson penakaceyutomonol pesqahsuwehskil
Kisacuwiw ‘ciw sepawonuk
Siqon sesomitahamqot
Nhok pomsonuwiw

Mecimiw ksihkehe eli nonaqsi tahalu Skicin naka LGBTQIA2+. Mecimiw ote nti walokuk, epahsiw. Skicinuwey eleyimok sqi-punasu, mate okimqotu. Amalhocosseweyal nkiseltomakun psiw keq nuskuhutomon, kenuk mec ote ncuwi katun. Wiciw psiw keq eleyik pemkiskahk ‘ciw Skicinuweyal eleyimkil, nihtol wewinaqil mec okimqotul, pomiyetul, apeq mate tepiyewiyik pomawsuwinuwok weci pomiyewik. Tahalu weckuwi nutwikhiket, nmetsey? Mecimiw-ote ntolitahasihpon sami metsiw weci kehkimsi Skicinuwey ntolatuwewakon, weci peciyay, piyemitahatom, eleyimkil, kenuk ontama. Mec ote ntihin lewestuwakon. Nkiswehkan. Koti nihkanatpiyin, cuwi wehkan lewestuwakon. Amalhocosseweyal iyol weci keq itomon, ‘komasiw. Nihkanatpat ‘tolewestuwakon wicuhketomon keq itomon naka nit tec Skicinuwi amalhocossulticik kisi Skicinuwi nihkanatpahtuwok. 

Kpisotomaha mahkiyew pomawsuwakon
‘Koskaha etoli skomawtossokil
Weci unitahasiyin wetomeyask 
‘Kiseltomuwan kmoshun ‘tolintun 
Kpossahtuwenakun
‘Kulapetomon metuweyik 
Kenuk nokosayiw
‘Kulapetomon metuweyik
Kenuk weci kehkimsiyin
Aciyak mate sankewosehkewiw
‘Koti piyemi kakawi
Kpomawsin ehtahsi pomawsuwakon eli psontek
‘Koti mihqitahatomon psiw ote keq
‘Kisi noluwasin
Kenuk aqamok
Ktokehkimsin

Liwihtasu amsqahsewey ntowikhikon ‘ci amalhewestuwey komac kinapiyiw naka maskihtaqot. Nmoskeyin? Ontama. Maqenassik kisi skuhutasu ‘ci Skicinuwi naka LGBTQIA2+ etoli leyikil. Skitkomiq kakawi acessu, oqimqot weci mace skuhutomeq naka monuwehkiyeq. Mecimiw ewasissuwi Skicinuwiyan, mecimiw skuhutomonen nipuwihtit ehpit naka skitap ewikiyanpon. Pemiki naka yaliyay psi tama Kanata, nkisokehkims ‘ci piluweyal eleyimkil naka eli nonasik. Kisi-te wen Skicinuwiw naka piluweyin. Kisi-te wen Skicinuwiw naka nisi-cocahq. Mehsi tokec? Ehtahsi pomawsuwin cuwi pskomon ‘ciw ote nekom. Anqoc ktacuwi minuwi papetokehkitomon. Cuwi minuwi itom. Pesqon ote koluluwakonol ehtahs. Skitkomiq eci tkiqok ksehtaphukun. Mate psiw keq ‘kisi asitewtomuwon sasokiw. Asitewtomuwakonol oc peciyetul. Nil ote nit naka piluweyak Skicinuwok nihkanatpahticik wecu skuhutomeq skat ‘komasi skuhutasinuhk. Nit weci kinitahatom amalhocosseweyal. Nihkanatpat ‘kisi eli tkoqok weskuhutasik naka ‘kulopehtun tahal keq welinaqok. Nihkanatpat nil keti apqotehtaq pomaw-suwinuweyal sisqol ‘ci pileyal nemihtasikil, naka wici kcitomitahasuwakon. 

Temeyik pskiyahtoq
Poneqamik mip supeqok
Kispahsit nomehs
Sonuciw
Setolew cihpolakon
Kiluwahat wiphunom
Setolew malsom
Kiluwahtun piyehsuwew
Pemicuwok mimey
Naka pomehloqe wikposs
Nilawey eleyimok
Kemutonasik
Kpawatomon piyemi kolowok weckuyewik
Ktahcuwihtun ewehkiyin keq piyemiyak

Ewasissuwiyan naka yali kiluwahtuwan elinaqsi, mate keq tama. Wicuhketikonol mate eluwe tama. Pemkiskahk, tan tehpu keq ‘kiskehkims, naka piyemi kisac. Nkisassihqak wisokeluhtit Skicinuwi nihkanatpahticik naka amalhocossewicik kehsikoton. Psiw eli nonomuhtit nowicuhkemkun weci woli kiluwahtu nilawey Skicinuwey eleyimok. Kcicihtomuwakon eyihtit nikt kehsihtit Skicinuwok Kehcikotonhoticik kinapihihkuhukuk weci piyemi woli sotom Skicinuweyal qinte eleyikil naka eleyimkil. Naka nituwin weci nisehtu naka nutahan etoli wolomolsi. Nituwinol qeckuhtikonol weci pomiki tahalu nihkanatpat. Mate nomihqosiw tahalu nihkanatpat, kenuk nihkanatpat lamiw eyit tuhkiye. Amalhocosseweyal cuwi pomiyetul. Eli nonaqsi kolopite wiciw milikok eli pawatom. Psiw ote keq otek ntolomakonok, nkisi oc nil ote nil.
 

Pomuhs sapeyik ktahkomiq. Pomihpt cocahq kansuhsey. Ehtahs elomelkiyin kcitpot. Pomuhs wiciw sisqol qihiw tama Kehcikotonhoticik eliphusk. Op-al, assokitahasit wasis. Pihcetu cuwi liyayon. Piluweyak oc ksokassultuwok eliyayon, elapomosk nokotomoniya cilsasikil. Pomawsuwinuwok oc oluwikalkuk, ‘kisehtakun ktolalkatomon waloq. Kat-cu nutahtahsikoc, sapeyik ktahkomiq mulalokot. Sinpekhikewiw, kinsonuwiw. Ktewepelkun. Wiciw psiw nehsewon, ktewepehtun kwoniyakon. Kinapiyit, kisolutok wasis. Kat-cu conessihkoc. Ehtahsi elomelkiyin kcitpot. Kil tokec cuwi nokotomon keq ewikhasik ‘ciw tan wen peciyat apc.

Nihkanatpat pomiku sasokiw. Tahalu psiw kilun, nowapoless. Nihkanatpat cuwi kisacu ‘ciw tan tehpu keq. Nihkanatpat cuwi ksapotom. Nihkanatpat cuwi mecimiw wolelosu. Nihkanatpat cuwi woli-miluwe. Nihkanatpat cuwi militahasu. Nihkanatpat cuwi sakolosehke ehtahsi-kiskahk. Cikawote ksomkuhut, nihkanatpat mate ehtahs cuwi lewestu. Nihkanatpat kisewestu ewehket amalhocesseweyal. Kmihqitahatomon, ewikhasik petawotu ‘qotamqahk kolusuwakonol naka nihkanatpat ‘kisayektunol kolusuwakonol. Onsa nit emawsiyin etoli wolomomqok mahkiyew, naka piluwapotasik ‘kisi nahsonan apc nastehkasicik.