Phil Lavoie

N’k8kzaldamenob wak8likwsipsigaskw waïjiwi. Chiga wskinnowia, n’kadi kzikadawikh8gab wak8likwsipsigaskol ta n’wigi kzikadawikh8gab nionata nspiwi nid8bak. Kwani kasigadenal pm8wzowinnoak w’kzaldamen8 nkzikadawikh8gannawal, ni nspiwi internet nliwitamw8ganna, nd’8kolh8nn8b wakaswak w8baksak ta kaskisak nspiwi internet ta iogik n’pon8nnab al8miwi ndal8mkiikok. Wji mdala kasigaden, nd’8kolh8nn8b wakaswak w8baksak kanwa nikw8bi, nd’8kolh8nna kaswak kasatgwa w8baksak nnod8kolhaïgamikwnak. Pamkizgak, nd’8kolh8nna nnod8kolhaïgamikwnak Molianek ta achi iawinska ktagamikwikok. Wjita, n’kzaldamen achi awikhaw8gan ta 8kolhaw8gan.

Chiga k’wig8damobna wji aln8baïntatwinnoak, nd’achwi m8mjim8nna achi nigik wji wdalokaw8ganw8. Kanwa nd’achwi piwihozi, ta nd’alidah8zi ali nd’achwi m8mjim8nna achi aln8baïntatwinnoak chiga alokak pilwiwi. Kzikadawikh8gamek ta aligw8nsamek odanaï-sawaw8ganal, nda alnigowi kanwa wligen achi.

Chaga n’s8biwawaldamenna ndaln8baw8wzow8ganna, n’kizi alokabna aln8baïwi. Aln8bak nda alokawiak waïjiwi aln8baïwi ta alokak pilwiwi kw8gweni wd8tlokaw8ganw8 pilwigen. Ntatwinnoak aln8baïak achi, mikwaldamoda ni. 

Chaga nda n’tbelod8ziwbna aln8baïwi, n’waniadonna ndaln8baw8wziw8ganna, ta n’klozibna nod8ïwi... Ni nd’aln8ba8dwabna nod8ïwi.

Asma, nd’aln8baïb kanwa nda nd’idamowenob kw8gweni nda nd’alokawb aln8baïwi. Aln8baïntatwinnoak achwi klozoak kasiwi, nigik kzaldamenn8 aln8baw8wzow8gan, wawinamak, makagamoldimek, podawazoak, agakimzoak aln8baïwi. Pam8bagen8t wijokama aln8bak.

N’kizi tbidah8damenana ndaln8baw8wzow8ganna. N’wigib kchi odanak, nda nd’aln8ba8dwawb, ni n’kzikadawikh8gab wak8likwsipsigaskol wji nnod8kolhaïgamikom. N’pilw8tloka kanwa nd’aln8baï8tloka achi.

Nd’agakimzi aln8ba8dwaw8gan wji wakaswak kizosak ta n’wig8damen. Agakimzikw achi aln8ba8dwaw8gan. Agakimzowinnoak tagaseswak, kanwa kz8wadoak ta w’nanawaldamenn8 aln8ba8dwaw8gan ta aln8baw8wzow8gan.

Pam8bagen8jik ta aln8baïntatwinnoak achwi pilwalokak. Wji nia, pm8wzowinnoak achwi 8taln8ba8dwak. N’kadi nanawaldamen aln8ba8dwaw8gan, kd’8bchi waniadonana. Agakimzoak tagaseswak, kd’achwi mlikalokabna. Ta nia, n’kzaldamen wak8likwsipsigaskw ta aln8ba8dwaw8gan, nd’achwi nanawaldamen, chowidba