Jason Brennan

Wipatc niki inentan kitci kikinoamasowan ka ici masinatesitcikanikak kitci ici mikimowan. Awiec mitatcin acitc nanan piponesinapan. Kawin tac maci niketcinamentasinapan kitci otitaman, kawin meka tesipan awiek kitci nosinewak ii apitc kitciki noswamak. Acasa acitc niki matci mikimonapan. Mane mikimowin niki ici mikimonan. Apitc ka nicitina acitc nicin piponesian, nikita kikinoamason Collège Algonquin icinikate, Ottawa kak. Mamac niki tacikan kitci akwakwian iima kawi icitaiapan. Mane mikimowin niki mosatan. Kawin tac maia niki ici takwan kawi icitawiapan. Panima tac ki tepwetawitisowan kitci kakikinwamikoan.

Mi iiweti pecik kekon e ici pakanakosiak anicinapek iki ka wapisiwatc. Panima kinawit ka nikaniek acitc anotakanak anicinapk, kitci tipatcimoiak e inakanisiak. Nin maia e inentaman e anicinapewian, nawatc natotawak ni pecikotenam, ka otcian, ni kitci anicinapemak. Mi tac iiwe eci pakanakwak. Ka ici wapateiciwatc, ni kitci apatciton, kitci kekon ii. Panima kinawit ki mikitamak. Acitc tac, kinawit ka nikaniak ki tinentakosimin kitci nakwan e inakanesiak, nawatc tac kita mikotcikate e ici kackitoak kitci opeckamakak ka ici kackitoak, kitci nakwak e ici taiak acitc kotak awiakok.

Nin, ni tatam anicinapewi, ni tcotcom tcikocikwewi. Ni kikentan eka tepwe eki sakakweian, kawin tapickotc ka witci mikimomakwa. Kawin maia anicinape niticinakosisi, ni cakei, ni wapiskisinan, kawin nimakatewatipesi. Kawin nitotci nakickasin matcentcikewin. Pekic tac, ka pakitinikewatc kawin otepwetasinawa nimikiwinan misawatc kapi icisek otakanak pipon. Nakwan mane atisokannan e kitci minwacikin ka ici masinatesik, mane masinatesitcikanan ki wapitcikatewan e ki inentamowatc awiakok. Kitciki capockamak kasakakweiak, panima ki nakwikatamak. Panima tac ki mikamak kitci minwacitoak ki wanatisiwinan kitci ki wapatamoatc awiakok. Mikamak maia ati ke ici atoak kitci wapatamowatc acit kitci kicikmowatc. E inentaman acitc, panima pacitc kitci wapataiak misiwena akikak. Ninawit Nish Média, wipatc niki nisitotanan e kitci wapatamotc ni mikimowinan misiwe akikak. Apan ikotc eka pontowan mi panima e minosek, eka kitci anwetcikeian, e nikok mikimoan. Ka ici mikimoan apan ikotc aniwak panima mikimowin takwan. Aawe anotakan ka ici mikimotc kicatc e inatenik, kawin tepwe kata sakakwesi kawin tapickotc ka ocki matcitatc. Panima acitc kitci mikwetaman ka ici tewatc otaminowinik, masinatesitcikanikak, masinaikanikak ka ocitowatc kanikaniwapan apwa maci kinawit. Panima ki kakwe nisitotamak ka ici minosenik ka ici ocitowatc. Acitc tac, nikikentanan, ka otciak, ka icitacikeiak, kiminwetana e matinamakeak mitac kitci minose e kakweteian anotc kekonan, kitci nta nakickwatotc awiakok. Ka ici nakwak kimikimowinan. 

Misa ako e icipicamakak. Ni tanicinapewin, mi ii ni pimatisiwin. Ni tatam ka ici opikitc anicinape aki, mane acitc nipecikotenam tacikewak kiapatc nokom, mi e icinakosian. Ka ici wapataian e masiatesik, e ocitoan, ni tipatcimonan atisokanan e kikentamanan, kawin niti-patcitosikekon kitci kakes tipatcimoan. Kapi wapataman, kapi mosataman, mi ii we e apatcitoan e mikotaman. Nanikotin, e ki notaman e ockimatisiapan. Mi ii ka icitawatc totamowatc kewinawa tapickotc nin. Kicpan eka kikentaman atisokan, eci petenakwan eka kin ekak e otcimakak. Apan ikotc ki totaman kekon e iciwepak, kepi iciwepak. Takwan kiapatc e wi tipatcimoan, kitci kicikapataman weweta, mane kekonan kiapatc kitci tipatcimoan, panima tac nipiton kitci tipatcimoan kitci totamowatc mane awiakok. Apitc e mikitaman ka icitaian, nanikotin ni witciak ka ockimatcitawatc, niwi tamaok kitci kapatak odakanak opimatisiwin kitci apatcitotc. Acitc esa, panimamikaman atasokan e minotaman kitci apatcitoan weweta kitci tipatcimoan. Panima tac acitc kapena ki akwawian ka tepwetaman.

Ke picamakak nikan kita minwacin. Aca mane awiakok tewak e mikimowatc ka icitaian. O mikitanawa kewinawa kitci nakwak e inakanesiek kinawit e anicinapewiek. E apitetakwak tac, apan ikotc kitci kicikapataman e ocitcikatek ka minwacik, kitci ocki ocitoen apan. Mane awiakok weweta mikimoak. Aca kitotitanan kitci icpinimitisoak kitci apatcitoak ocki inentamowin. Panima apan ke icitaiak kitci apatcitown ka ocki kekonan kitci kakwe capockaman ki mikimowin.

Kinawit ka nikaniak, weweta ki katotanan eka kitci waniciniak, kitcimikwetaman apan ati wetcien, apan kitci mikwenimita kit anicinapemak, ati wetapikicinian