KZEL8MSENILINTOW8GAN

Pasojiwi sibok, Awassosis namiha pitta kchi aln8ba, odanaïwaw8damwinno. 

Wa kizi wd’abo kwinapskok ni alin8gwezo wazasshiga witkwaljial wskijiwi maskwak. 

Awassosis pasodokawa kchi san8ba. W’kinamen maskwa, kanwa ndakagwi w’namitowen. 

— Awassosis nadodmawa: Kagwi kd’aloka? 

— Kchi san8ba 8zidawa: Nd’awikhiga kagwi wji kzel8msenilintow8gan. 

— Kzel8msenilintow8gan? Awassosis idam: Kagwi ni? Ndakagwi wskijiwi maskwak. 

— Mina kina, idam waw8damwinno. 

— Tagdatta ndakagwi n’namitowen, 8zidawa Awassosis. 

Ninawa kchi san8ba idam: Tbestawi, k’n8ji 8tlokawol nd8tlokaw8gan nspiwi kzel8msenilintow8gan. 

N8wat, kwani sagp8wl8msenek, odanaïphanem kizi gw8zilha ni asma w’pedgipaïawi.

Ni agwa, n’kizito abi pasojiwi sibok ni n’nadodmaw8 kzel8msenek: K’wawaldam t8ni ao na phanem? 

Kzel8msen idam: Awighiga na phanemiliwizow8gan wskijiwi maskwak ni wd’alintoji nspiwi nia. 

Nikw8bi, chiga n’kadi nodamen na phanemilal8mow8gan, nd’abi pasojiwi sibok, nd’awikhiga wd’aliwizow8gan wskijiwi maskwak ni n’tbestamen kzel8msenilintow8gan. 

Sagp8wl8msen kizi m8jalab niswiak, kanwa kizi w’pedgipaïa kzel8msenilintow8ganek.