QEQCOKUHS WEWITAHASUWAKON

“Cipotu pomawsuwakon mace iyu tan piluwey eli nomiyusk.”
– Michel Houellebecq

Cossoleweyak kisuhsok mesq mehcinewan ote piyemi pomawsiyanpon. Nomihtun nit pemkiskahk, npomaws ‘cey cocahqey skitkomiq. Nulitahatomon psiw keq kisi olluhkiyanpon, kenuk psiw ote yut ipocol nekom. 

Woli skitap not. Sapitahasu, woli tpinomon psiw keq, naka ciliw, wisoki somahtuwiw, aqamok katok tan tehpu muwin. Mate kmihqapomaw etoli cocinaqok, kenuk ‘t-ihin keq kinuwikok. Natkuwot, woli nomihtasu. Onsa tolihtaq amoniw eyit macihpute. Anqoc pomawsuwinuwok mocomomawal, ciliw yukt skat eyitiq kinitahasuwakon.

Mate kenuk nil.

Amsqahs nemiyuk, ntolihponoloq ipocol ‘siskul eci possahtuwek kinuwiw komac. Anqoc siktelomu, anqoc onsa tkeyit weci psikehtaq tuwihtikonol, polipt wissekikuhusutiyil.

Psiw ote eluwe pomawsuwinuwok amonihqahtit wisokitahamawal, kenuk kakehs mate messuwiw. ‘Toqeci mecimiw piluwomtultuwok, naka qeci wolomolsultuwok qeni yuhusultitit eli kisihtaq eleyuwat psi wenil nituwit ‘ciw ‘toluhkewakon. Leyu eli komasi sitkuhut, stehpal anelsit.

Qinte-te leyu eli tehpu wahkessuwok cikihtasultitit sankewitahasultiniya qeni itomuhtitit tan elomolsultitit. Pomawsuwinuwok nutiyahsultitit kakehs polapomak kosona ‘t-osahak yalikhahsultitit ‘ciw sankewi-pomiyak. Eci kakawomomqok etoli katasik ‘cel cipomonqot. Kenuk mate ‘ciw nil.

‘Ci-maciyiw amsqahs, nomihtun keq lamiw. Kat not tehpu pomawsuwin tahalu wen piluwey. Apeq elinaqsit, nomihtun eli papehk ote nil. Onsa nil kahkakuhs wikinomon seski-pitiyahtek lalkasik: Npawatomonehpon tehpu ‘ciw nil.

Mate nwisoki tpitahasiw, kis tehpi yali pisuwotahq. Kehsikoton qenawsi, ntolomaht onsa ntoli qeci monowehkuhusiyan. Sapiyetul yuhtol kisqol, etoli amuwi-wolihpotek, unitahasuwakon ‘sistolomol wisokomolsuwakon. Not not etolaskuyukpon.

‘Ci-maciw neke, mace nuhsuhqa. Nwik elomelkit, npomawsuwakon wiciw nekomuwey.

Ehtahsi-wespasahkiwik, ntuhki etoli tpitahamuk naka tena elinaqsit wicuhkemit weci kuwi, ehtahsi-nipayiw. Nkisi milan npomawsuwakon qeni tpinuwok. Nkisi lahkals, onsa wihqhit keq kinsonuwik. 

Wespasahkiwik, miyahsi tuhki. Npenakacey elomuhsi wikuwak. Sapiw posiyanteskik ehtek ihtoli-mawiyamok, nomihtun pokotahkek pemessik naka olomiya oloqiw ihtolahqatimok. Anqoc wespahsahkiwik, ciliw mehtlukemk, nkisi tpinuwa piyemi sipkiw. Totolossomin ‘kapewom naka sehke, sankihiw opu, etolokisit. Nkisqep, weci kisi wolapomuk, weci sesomitahatom ‘qotamqahk milinaqil nemihtaq yut musqonocihtek elahtuwek esapotasik. Nopal kehsukoniw nit nil lapomit, wiciw keti nomihtaq.

Luhkemk piyemi kispahte. Kakawi macehe, mate sankewtek pokotahkek tama lamiw wikuwamok. Nkiluma, anqoc nusuhqa tokiw ote ihtololuhket, kenuk amuwiye nit, wisoki ‘sanaqot ‘ciw nil. Nit tuciw, wahkac ote ntopitahatomon eci amuwiyay. Ncelehtun. Ntolitahasuwakon koti mawessu wiciw nekomuwey. Onsa nil wen etoli ktomakiyut etoli wihqaphat mulayalokok. Nkisi qecess. 

Wahkehs, ‘ci macehe wikuwak mesq kisi tetomihqaw. Nutehe seski-sepay wiciw atacuwakon naka ksihkassu kakehsukoniw naka kehsi-tpuhkil. Apeq elsonuwik eli pawatom, ntaluwi nusuhqa nit tuci pihcetu, ‘ciw nit qoniw. Yali kikimskahs onsa psahkeyit etoli tpinomuhuk wik, siqehte, piqaskuwas weci apaciyat. 

Qeni ksihkassit, onsa elomolsi mehciniyan. Tehpu nkisi sesomitahatomonol ktahkomiqol kisi sipki tpitahatok, weni kisi pehqiyamat. Kehsi kisi pskok, piluweyal milut. Ntolitahas wolitahasu, tehsahqiw ‘t-amkahkonok. Pomawsuwinuwok nituwiniyal; wisokitahatomon elluhket. ‘Pawatomon piluweyu, weci wicuhkemat tan pilyemi nituwihtit. Wolehtunol aluwi-kisitahatasikil naka pahculuwewakonol nihtol apenkuwiht naka apenkasuwol wiciw memhuwi siktelomuhtitit tan eci mehtoluhkatok keq. 

Kenuk nil, uhsimis ‘ciw wasisok toleyak skitkomiq, ‘cel ntaluwi natkuwi, weci wihkutom yut sesolaktehkikon. Mate nowihqimku; mec-ote mate kocicihtuwon eli pomawsi. Nuli-kcicihtun ‘ciw osahmuwakon sqotewik wiciw cipotu wen ksihtaha.

Nkisi piyemi sitkuwa tan eci liyat kcihkuk, tehpu nit. Anqoc nataqtihike naka sipkiw piwsokuhke. Stehpal yut olluhkewakon kcitpok ‘ciw nekom naka eci sapi-tpitahatok kisi tehp Skitkomiq apqotessu neqiw ‘sitiyil; mec tehp ankuwi laqtihike. Nit mecimiw, kcihq koloqelokun toqiw, ntihiponuhpon nit nisiw. Nkisi punos qihiw, wahkessuwok oposiyik aqamok, oloqiw eyik wocawson. Psiw-ote keq nomihtun, nutomon psi keq Naka ‘cel peciw nopossehtun. Nokihsehtasin wissehkonukun yuhtol withoketomonol, onsa pilsewokiyan.

Neqt, tkikiskot, nemte koti macelan, pahseyu ewon. Tihtiyas nanaktehsin ewepiw noniyakonok naka mace kinuwehtasin. Ahtoli masqolamu ‘ci-maciw pesqon pskiyahtoq tokiw kotok onsa koti milimit. Apeq nkisi sankewosehk qeni qeci ahsimuk eli kolowok koti olluhki, peci kinitahasu naka nokosayiwoss, nuhuwok peci wiciyemawal onsa cipokihtaqok mawintuticik. 

Nil acihtuwin kisi wonakessu ‘ci-maciw kuwok epitpon, kinuwehtuwa etolotemultitit mecikihtit sipsok. Assokitahasu, ckuye nil oloqiw eyyi. Olomomqot onsa koti mehciye. Mate nopawatomuwon epahsiw nkihtahkomikum astuhtehson wiciw qinte eleyik tahalu yut! Mate nkisaciw, mesq ote. Naka, tan op ntolinaqsin, mocuwi ipocol nulomahqolate, wilipekos tupqanok? Eli kisi katsi kataskomiq, nit-te elepewiyeq onsa nekom. Nkoloc. Aqamok wewomotom ‘tomitahasuwakon ewepessu, aqamok eluwete ntahsimos eli nkisi, wiciw kekesk wolelomoqewakon, acess tahalu ponapsq. 

Mehciyak mahkiyew askomiw, peci petakiw, on ehta sesolakiw pisuwi sukalan. Toqehsey cocahq wisa pkonomonol wehkewakonol, motqap naka wissekhomon ellaqek piwsoqol ewehket kinkiqok mosqonocihtek wissekhusut. Qolopapu apc neqt nil eyi naka, tokec op skat nit komiwoney kpotekopolikon cepkuwinomok, nominyoq op nit, etoli wisokaskuwasi Kisiyulinoq kiswikhok, tama lamiw kci wikhikonumok, elektek pihce eleyikpon nilun tepeltomeq. Wisa macehe ‘ci kuwehkewikanok ‘cel pomi qasku.

Nkinomols, kcahqi, naka aluwi wansit wen nil. Mecimi-te nil ncikihtas ‘ciw keti leyik, naka tena ncikihtas ‘ciw kseltomuwakon. Nit eli kcimkok piluwi-pomawsultiyeq yut Skitkomiq cuwi wewinomonen yuhtol litahasuwakonol etutsonuwik naka katapomic pskomuwol eli sotomeq. Nihkaniw yuhtol litahasuwakonol anelsuwi cituwamqew. 

Nit weci, skat eyihq nipawset welaqiwik ehtek kinuwaskutikonol tahtopkomeq keti leyik, ncikihtas macephuken wici tan elomolsi, kisaqosok skat nomihtasinuhk sqasuntoqiyil ‘ci ceconimsi. Nilawey skitap ‘t-ihinehpon skat cuwi ihihq, tahalu nomehs skat eyihq wolahq. Mace nihkanessin, tepinuwit tehpu etoli kakaluwewik nekomwey nahkawtomuwik litahasuwakon, cuwi ote assihkok nilawey pemolaqik.

Posessomok kiyaqopuponik, kansuhsok itomuhtuwok. Wikhasuhpon. 

Nkisi nihkanuhs ‘cel nsiskul epahsi-kpotetetul, ntaqanehsom wiciw yut kci wolitahasuwakon tehpu yukt qinte-te kecicihtutit tama elapasihtit. Mate sesomiw koluhtomuwon eli amsqahs elapomit, nit-te ‘siskul nemihit, ‘sotom oc. Malom-ote, skitkomiq koti cituwamqewiw weci cikihtok sapacomuwakon sapiyewiw. 

Neqiw ‘sitol, mate nowewomotomuwon eci nuhkeyik kcihqey pemsokhas oloqawtosson etoli sakoleyik ponapsqey awt ehtek Parc des Laurentides. Nomihtun elahtuwek utapakon naka mate nsiktehpayiw. Wisokohantuwi nokosayiw, masqolamihtit tayewok awtik naka metehtehsok nkisehtakun Koluhtomon pihce-etololaskuwahtu assokinaqok.

Apeq pskkitess, kisi kinuwehtuwak psiw ote eluwe cocahqok weci wicuhketomuhtit olsonuwakon ‘ciw nilawey cossolewey enawkakon qeni mace qasqi asit oposihkuk weci sankewi mehcini. Qeni nutecuwok pomawsuwakon hokek, mec ote nsankewitahas, ncituwess oloqiw qinte-te eleyik.
Mahkiyew, nopawatomonehpon nuhsuhkomon wetaptu weci itok apc oc, kenuk mate conessiw. Mate ntoqimaw, ipocol weyossisok ksihtahak awtihkuk yut wikultiyeq, leyuwol ehtahsi-kiskahk. Naka tehpu nil pilsqehsisuwi-malsom, wasis toley kcihkuk etoli koti aqami pcitahket eli wiwonasi pomawsit weci pskok psi-te keq wecessik elapomat skitap.

Stehpal psiw keq pemawsuwik Skitkomiq ‘cihtasu pesqon ote skat toley skitkomiq. Psiw-ote ktihinen pesqon ote Wikuwossey-Wecihtasik. Nit weci, tan eci nisonul qeqcokuhsol cipiyatqawtik, tehpu neqt ewikultiyeq, mecimiw tehc ‘t-ihiniya kekesk, pesqon piluwey. Piluwihtasikil laputihikonol. 

Penakaci mehcin tehsahqiw cahcahqes, kenuk sankewitahas ipocol nkisi wisa-lapomotipon, elsonuwewik mawessuwol. Tuciw neke, elapomit, ‘cel aqami nomiht katok mecimiw, mec ote npomaws, malsomuwi cocahq. Askomiw mawopipon.