Robert Kanatewat
ᐧᐄᔾ ᒌ ᐱᒥᐱᔨᐦᐧᑖᓯᐤ ᐋᐱᑎᓰᐧᐃᓂᔨᐤ ᑭᔮ ᑎᐹᔨᐦᒋᒑᓰᓈᐦᒡ ᒌ ᐋᐱᑎᓰᐤ ᐧᕌᐱᕐᑦ ᑳᓈᑎᐧᐋᑦ ᐧᐄᓵᐧᐋ 1930 ᑳ ᐃᔅᐱᔨᔨᒡ ᒋ ᐱᒫᑎᓰᐤ ᐊᓂᑖ ᐃᔨᔨᐤ ᐊᔅᒌᐦᒡ ᐊᓂᑖ ᑳ ᐅᐦᒌᔨᒡᐦ ᐃᔨᔨᐤᐦ᙮ 2007 ᑳ ᐃᔅᐱᔨᒡ ᐋᑯᑦ ᑳ ᒌᐦᑳᔮᐱᐦᑎᐦᒡ ᐃᔨᔨᐤ ᐊᔅᒌᔨᐤ ᑯᐯᒃ ᑎᐹᔨᐦᒋᒑᓯᐤ, ᒥᓯᐧᐋ ᐊᓂᐦᐄ ᓂᑐᐦᐆᔅᒌᐦᒡ ᑳ ᐧᐃᓯᓈᑖᒡᐦ ᐊᓂᑖ ᒉᐃᒥᔅ ᐯᐃ ᑭᔮ ᒌᐧᐋᑎᓅᑖᐦᒡ ᑯᐯᒃ ᓂᔅᑭᒧᐧᐃᓂᐦᒡ 1975 ᑳ ᒥᓯᓂᐦᐅᓱᓈᓂᐧᐃᒡ ᑭᔮ ᐃᔨᔨᐤ ᑎᐹᔨᐦᒋᒑᓯᐤ ᑳ ᐱᒥᐱᔨᐦᑖᑦ᙮ ᐧᕋᐱᕐᑦ ᑳᓈᑎᐧᐋᑦ ᐅᓯᐦᑖ ᓂᔮᔪᒥᑎᓂᐤ ᐱᐳᓐᐦ ᒌ ᐱᒋᐦᑎᓂᓯᐤ ᐋ ᐋᐱᑎᓰᐃᔥᑎᒧᐧᐋᑦ ᒥᓯᐧᐋ ᐅᑎᔨᔨᒻᐦ᙮ ᒨᔥ ᒋᑭ ᒌᐦᑳᔮᐱᑎᑭᓂᐧᐃᔨᐤᐦ ᒥᓯᐧᐋ ᑖᓐ ᑳ ᐃᔑ ᐱᐦᑯᐦᑖᑦ᙮
1968 ᐄᔅᒄ 1977, ᐧᕌᐱᕐᑦ ᑳᓈᑎᐧᐋᑦ ᒌ ᐅᒋᒻᐦᐋᑲᓂᐧᐃᐤ ᐊᓂᑖ ᐅᑎᐦᑖᐧᐃᓂᐦᒡ ᒋᓵᓰᐲᐦᒡ ᐊᓂᑖ ᐋᔥᒄ ᑳᒌ ᐧᐄᒋᓈᓂᐧᐃᒡ ᐧᕚᕐᑦ ᐧᒑᕐᒡ ᒥᓂᔥᑎᑯᐦᒡ᙮ ᐋᑯᑖ ᐊᓂᑖ ᐹᔓᒡ ᐋ ᐃᐦᑎᑯᐦᒡ ᒋᓵᓰᐲ ᐊᓂᑖ ᑳ ᐃᑖᔨᐦᑎᐦᒃ ᑯᐯᒃ ᒑᒌ ᐃᔅᑯᑎᒥᐦᒑᑦ ᐋᑳ ᐧᐃᔅᑳᑦ ᐹᔨᑯᓂᐦᒡ ᒑ ᐃᔑᓈᑯᓂᔨᒡ ᐊᔅᒌᔨᐤ᙮ ᐋᑯᑦ ᒫᒃ ᐧᐃᔾ ᐹᔨᒄ ᓈᐤ ᑳ ᐃᑎᔑᒡ ᑳ ᒥᓯᓂᐦᐆᓱᑦ ᐊᓂᔮᔨᐤ ᒉᐃᒥᔅ ᐯᐃ ᑭᔮ ᒌᐧᐋᑎᓅᑖᐦᒡ ᑯᐯᒃ ᓂᔅᑭᒥᐧᐃᓂᔨᐤ, ᐋᐧᐃᒄ ᐊᓐ ᒫᐧᐃᒡ ᐋ ᐅᔥᑳᒡ ᓂᔅᑭᒧᐧᐃᓐ ᐋᒌ ᒥᓯᓂᐦᐅᓲᓈᓂᐧᐃᒡ ᐊᓂᑖ ᑯᐯᒃ᙮ ᐧᐧᐄᔾ ᑭᔮ ᒌ ᐧᐃᒋᐦᐄᐧᐋᐤ ᑳ ᐲᐦᑎᑯᐦᐋᑭᓂᐧᐃᒡ ᒉᐃᒥᔅ ᐯᐃ ᑎᕓᓕᐱᒥᓐᑦ ᐊᓂᑖ ᐧᐃᔮᔅᑯᓂᒑᐧᐃᓂᐦᒡ᙮ ᒋᓈᐅᔥ ᒌ ᒫᔑᐦᒑᐧᐃᒡ ᐧᐹᒧᔥ ᑳ ᓂᑳᓂᑭᓂᐧᐃᔨᒡ ᐊᓂᔮᔨᐤ ᐋᐱᑎᓰᐧᐃᓂᔨᐤ ᐊᓂᑖ ᐋ ᐃᔅᑯᑎᒥᒑᓂᐧᐃᔨᒡ᙮ ᐋᐧᐃᒄ ᓂᔥᑎᒻ ᑳ ᒌᐦᑳᔮᐱᐦᑎᓂᐧᐃᔨᒡ ᐃᔨᔨᐧᐃᒡ ᐅᑭᔥᒋᐦᐆᐧᐃᓂᐧᐋᐤᐦ ᐆᑎ ᑳᓈᑖ᙮
ᐃᔥᑯᑎᒃ ᒥᓐ ᑳ ᒋᐦᒌᓈᓂᐧᐃᒡ ᒑ ᐃᔅᑯᑦᒥᐦᒑᓂᐧᐃᒡ ᐋᑯᑦ ᑳ ᐅᔑᐦᑖᑭᓂᐧᐃᒡ ᐊᓐ ᒉᐃᒥᔅ ᐯᐃ ᒋᔖᒫᔅᑭᓂᐤ ᐊᓂᑖ ᒑᒌ ᐃᑎᒧᒡ ᒋᓵᓰᐱᐦᒡ ᑭᔮ ᐋᑯᑦ ᑳ ᐋᐦᒋᔥᑖᑭᐧᐃᓐᒡ ᒋᓵᓰᐲ ᐊᓂᑖ ᐅᐦᒋ ᐃᑖᐦᒑ ᒥᓂᔥᑎᑯᐦᒡ᙮ 2020 ᑳ ᐃᔅᐱᔨᒡ ᐱᓖ ᑖᐃᒥᓐ ᒋᔖᒫᔅᑭᓂᐤ ᒋ ᐃᔑᓂᐦᑳᑎᓂᐤ ᐊᓐ ᒉᐃᒥᔅ ᐯᐃ ᒋᔖᒫᔅᑭᓂᐤ ᐃᔥᑯᑎᒃ 45 ᑎᐦᑐ ᐱᐳᓐᐦ ᑳ ᑎᐱᐱᔨᒡ ᐊᓐ ᒉᐃᒥᔅ ᐯᐃ ᓂᔅᑭᒧᐧᐃᓐ, ᐊᓐ ᐅᐦᒋ ᒥᓐ ᑯᑎᒃ ᐹᔨᒄ ᑳ ᒥᓯᓂᐦᐆᓱᑦ ᐊᓂᔮ ᓂᔅᑭᒧᐧᐃᓂᔨᐤ᙮
ᐊᓂᑖ ᑳ ᐊᐱᔖᔑᒡᐦ ᐃᔨᔨᐤ ᐃᐦᑖᐧᐃᓐᐦ ᒥᒄ ᑳ ᐱᐹᒥᐦᔮᒥᑭᐦᒡ ᒌ ᐋᐱᑎᓐ ᐃᔥᑯᑎᒃ ᑳ ᐊᔨᒥᐦᐃᑐᓈᓂᐧᐃᒡ ᐊᓐ ᐅᐦᒋ ᓂᔅᑭᒧᐧᐃᓐ ᒑ ᒥᓯᓂᐦᐆᓱᓈᓂᐧᐃᒡ᙮ ᒥᐦᒑᐧᑖᐤ ᒌ ᐋᔨᒥᐦᔮᐤ ᐧᕌᐱᕐᑦ ᑳᓈᑎᐧᐋᑦ ᐃᔥᑯᑎᒃ ᑳᒌ ᓂᒋᔥᑯᐧᐋᑦ ᐧᐃᔮᔅᑯᓂᒑᓯᐤᐦ ᑭᔮ ᒫᒃ ᑎᐹᔨᐦᒋᒑᓯᐤ ᐋᐱᑎᓰᓯᐤᐦ᙮ ᐋᒌ ᐧᐄ ᒌᐦᑳᔮᐱᒫᑭᓂᐧᐃᑦ ᒫᒃ ᒌ ᐋᐦᒋᔑᓂᐦᑳᑎᑭᓂᐤ ᐊᓐ ᒋᓵᓰᐲ ᐱᒥᐦᔮᐅᔅᒌ ᐅᐦᒋᒫᐦᑳᓐ ᐧᕌᐱᕐᑦ ᑳᓈᑎᐧᐋᑦ ᐱᒥᐦᐋᔪᔅᒌ ᒌ ᐃᔑᓂᐦᑳᑎᑭᓂᐤ ᐊᓂᑖ ᑳ ᓂᔥᑐᐧᐄᓈᓂᐧᐃᒡ 2016 ᑳ ᐃᔅᐱᔨᒡ ᐊᓂᑖ ᐃᔨᔨᐤ ᑎᐹᔨᐦᒋᒑᓰᓈᐦᒡ (ᐃᔨᔨᐤ ᐊᔅᒌ)᙮ ᐊᓄᐦᒡ ᓈᔥᒡ ᒥᐧᔮᐱᒋᐦᑖᐧᐃᒡ ᐋᐱᑎᓰᓯᐧᐃᒡ, ᒫᓂᑖᐧᐃᒡ ᑭᔮ ᒋᓵᓰᐲᐧᐃᔨᔨᐧᐃᒡ ᐊᓂᔮᔨᐤ ᐱᒥᐦᔮᐅᔅᒌᔨᐤ᙮ ᐧᕌᐱᕐᑦ ᑳᓈᑎᐧᐋᑦ ᒌ ᒋᐦᒋᐱᔨᐦᐧᑖᓯᐤ ᑎᐱᔨᐧᐋ ᐋᐱᑎᓰᐧᐃᓂᔨᐤ᙮ 1987 ᑳ ᐃᔅᐱᔨᔨᒡ ᐋᑯᑦ ᑳ ᒋᐦᒋᐱᔨᐦᑖᑦ ᑮᐹ ᑲᒻᐸᓃ, ᒋᔖᐅᑖᐹᓐᐦ ᐋ ᐋᐅᒋᐱᔨᐦᑖᑭᓂᐧᐃᒡ ᒦᒋᒻ ᑭᔮ ᓂᓈᐦᑭᐤ ᒑᐧᑳᓂᐦᐄ ᐊᓂᑖ ᐃᔑ ᐃᑖᐦᒑ ᐃᔨᔨᐤ ᐃᐦᑖᐧᐃᓐᐦ᙮
2022 ᑳ ᐃᔅᐱᔨᒡ ᐧᕋᐱᕐᑦ ᑳᓈᑎᐧᐋᑦ ᒌ ᒌᐦᑳᔮᐱᒫᑭᓂᐧᐃᐤ ᐋᒌ ᒥᔮᑭᓂᐧᐃᑦ First Peoples Medal ᑳ ᐃᔑᓂᐦᑳᑖᔨᒡ ᐋᒌ ᒥᔨᑯᑦ ᓘᑌᓂᓐᑦ ᑲᕕᓂᕐ ᒋᔖᐅᒋᒫᔅᐧᑳᐤ ᐅᑎᔨᒦᔥᑎᒫᒑᓰᒻᐦ ᐆᑎ ᑯᐯᒃ᙮ ᐋᐧᐃᒄ ᐆ ᐋ ᒥᔮᑭᓂᐧᐃᒡ ᐊᐧᐋᓂᒌ ᓈᔥᒡ ᒥᔥᑎᐦᐄ ᐋᒌ ᐧᐄᒋᐦᐋᒡ ᐅᑎᔨᔨᒻᐦ ᑭᔮ ᒑᒋ ᓂᐦᑖᐧᐃᒋᓂᔨᒡᐦ ᐅᑎᐦᑖᐧᐃᓈᐧᐋᐤᐦ᙮ ᐧᒫᐦᒡ ᑳ ᐃᐦᑑᑎᐧᐋᑭᓂᐧᐃᒡ ᐊᓂᒌ ᑯᑎᑭᒡ ᑳ ᒥᓯᓂᓲᓱᒡ ᐊᓂᔮᔨᐤ ᒉᒥᔅ ᐯᐃ ᓂᔅᑭᒧᐧᐃᓂᔨᐤ, ᒌ ᒌᐦᑳᔮᐱᒫᑭᓂᐧᐃᐤ ᐧᕌᐱᕐᑦ ᐊᓂᑖ ᒫᐧᐃᒡ ᑳ ᐃᔥᐹᔨᒡ ᒋᔅᑯᑎᒫᒑᐧᐃᓂᐦᒡ ᐋᐱᑎᐲ ᑌᒥᔅᑳᒥᓐᒃ (UQAT) ᑖᓐ ᑳ ᐃᔑ ᒋᔥᒋᐦᑖᑦ ᐋ ᓂᑳᓂᔥᑳᒑᑦ ᑭᔮ ᑖᓐ ᑳ ᐃᔑ ᐹᒋ ᐧᐄᒋᐦᐋᑦ ᐃᔨᔨᐤᐦ ᒑᒌ ᓂᓯᑑᓂᑭᓂᐧᐃᒡᐦ ᐅᑭᔥᒋᐦᐆᐧᐃᓂᐧᐋᐤᐦ᙮