Niap

ᓂᐊᑉ ᐊᒥᓱᐃᓂᒃ ᐱᒍᓐᓇᓯᓯᒪᔭᓕᒃ ᐃᓄᒃ ᓴᓇᓐᖑᐊᑎ ᐃᓕᑕᕆᔭᐅᒍᑎᓕᒃ ᒪᑯᓄᖓ ᑕᒐ ᐊᓪᓚᖑᐊᒐᕐᓄᑦ, ᐊᑭᓐᓇᒥᐅᑕᓄᑦ, ᓴᓇᓐᖑᐊᓂᕐᓄᑦ, ᐊᒻᒪᓗ ᒥᖑᐊᓲᕐᒥᓄᑦ. ᑖᓐᓇ ᐃᓅᓕᕐᑐᕕᓂᖅ ᑌᑲᓂ ᑰᑦᔪᐊᒥ, ᓄᓇᕕᒻᒥ (ᑯᐯᒃ ᑕᖅᕋᖓ), ᑖᓐᓇ ᐊᖓᔪᑦᓯᐹᖁᑎᐅᑦᓱᓂ ᐸᓂᒋᔭᐅᕗᖅ ᑖᑦᓱᒧᖓ ᑯᐯᒃᒥᐅᒥᒃ ᐊᑖᑕᖃᕐᓱᓂ ᐊᒻᒪᓗ ᑕᒐ ᐊᓈᓇᖃᕐᓱᓂ ᐃᓄᒻᒥᒃ. 

ᓂᐊᑉ ᐱᔪᑦᓴᐅᔮᕐᓂᖓ ᑕᒪᒃᑯᓂᖓ ᓴᓇᓐᖑᐊᒐᑦᓴᓂᒃ ᐱᒋᐊᕐᓂᖁᖅ ᓱᓕ ᒥᑭᔫᖏᓐᓈᓱᓂ ᐅᑭᐅᑦᑐᐊᐱᐅᑦᓱᓂ. ᑌᒪ ᐃᓚᖏᑦ ᑖᑦᓱᒪ ᒪᙯᓕᕐᒪᑕ ᐊᒻᒪᓗ ᐃᖃᓗᑦᓯᐊᓕᕐᒪᑕ, ᑖᓐᓇ ᐱᐅᓯᖃᕐᑐᕕᓂᖅ ᐆᑦᑐᕋᕆᐊᒥᒃ ᐊᑦᔨᒌᑦᔭᖏᑦᑐᓂᒃ ᓴᓇᓐᖑᐊᕈᓯᕐᓂᒃ. ᑖᑦᓱᒪᐅᑉ ᐊᓈᓇᖓ, ᐊᓕᐊᒋᔭᖃᕐᓂᒪᑦ ᒥᖑᐊᓐᖑᐊᓂᕐᒥᒃ ᒥᖑᐊᕈᑎᓄᑦ ᐊᒻᒪᓗ ᐃᓪᓗᒥᒃ ᐱᐅᓭᓂᕐᓂᒃ ᐃᓂᓪᓚᑎᕆᓂᕐᒥᒃ, ᐊᑐᕐᓂᖃᕐᓂᖁᖅ ᐱᒋᐊᑲᐱᑉᐸᓂᐊᓂᖓᓄᑦ ᓴᓇᓐᖑᐊᕆᐊᒥᒃ ᐃᓕᓐᓂᐅᑎᑦᓴᕆᑦᓱᒍ ᐊᒻᒪᓗ ᑫᒥᑕᐅᓚᕿᑦᓱᓂ.

ᓂᐊᑉ ᐊᑦᓱᐊᓗᒃ ᐱᔪᑦᓴᐅᔮᕐᕕᖃᕐᓂᖁᖅ ᓂᕕᐊᕐᓯᐊᕌᐱᐅᖏᓐᓈᓱᓂ. ᑖᓐᓇᓗ ᑕᑯᓐᓇᕋᓱᐊᑦᓯᐊᓱᓂ ᖃᐅᔨᒪᒐᓱᐊᕐᓱᒍ ᖃᓄᐃᓕᖓᒻᒪᖔᑦ ᖃᐅᑕᒫᑦ ᐃᓅᓯᖅ, ᐊᒻᒪᓗ ᐅᓂᒃᑳᓭᑦ ᑖᑦᓱᒪᐅᑉ ᐊᕙᑎᖓᓂ ᐃᓅᕕᒻᒥᑕ. ᐋᓪᓛᑦ ᖃᐅᑕᒫᕐᓯᐅᑎᐅᓲᑦ ᐃᓅᓯᕐᒥ ᐱᔭᑦᓭᑦ ᐃᓕᖓᑎᑦᓱᒋᑦ ᐱᒐᓱᐊᕋᑦᓴᕆᓕᕐᓗᒋᑦ ᓴᓇᓐᖑᐊᓂᕐᒥ. ᑭᓯᐊᓂ ᑕᕐᕋᒦᑦᓱᓂ ᓄᓇᓕᐊᕈᕐᒥ ᑕᒐ ᑰᑦᔪᐊᒥ, ᐃᓕᓐᓂᐊᕕᑦᓴᖃᕐᓂᖏᑦᑐᖅ ᓴᓇᓐᖑᐊᓂᕐᒥᒃ ᐃᓕᓴᕐᕕᓴᕐᒥᒃ. ᓂᐊᑉ ᐊᐅᓚᔨᒻᒥᔪᑦᑕᐅᖅ ᓱᓕ ᓃᓂᒐᕐᑖᑎᑕᐅᒍᒪᑦᓱᓂ ᖁᕕᐊᓱᒃᕕᐅᓕᕐᐸᑦ ᐅᑭᐅᑦ ᐃᓚᖓᓐᓂ, ᑭᓯᐊᓂᒋᐊᓪᓚᖅ ᓱᓕ ᐱᕕᑦᓴᖃᓪᓗᐊᔭᒥᒐᓂ ᑕᕐᕋᒥ ᐊᑐᐃᓐᓇᐅᖏᓐᓂᖓᓄᑦ. ᑌᑲᓐᖓᓂᑦᓴᐅᑎᒋᒃ ᒥᑭᔫᑦᓱᓂ, ᑖᓐᓇ ᐊᓪᓚᖑᐊᖃᑦᑕᓕᕐᑐᕕᓂᖅ ᑕᑯᔭᒥᓂᒃ ᐊᕙᑎᒥᓂ: ᐅᓇᑕᒐ ᐃᓚᖓᑦᑕ ᓴᓇᓐᖑᐊᓯᒪᔪᖅ ᑕᑯᔭᑦᓴᖅ ᐱᒍᓐᓇᓯᓯᒪᔪᖅ! ᑕᑯᓐᓇᑕᕐᒥᓂᒃ ᐊᓪᓚᖑᐊᕆᐊᒥᒃ ᑕᒐ ᐊᓕᐊᒋᔭᕐᑖᕆᓯᒪᔭᖓᑕ ᐃᓚᒋᕙᐅᒃ ᐊᑐᕆᐊᒥᒃ.

ᐅᑭᐅᖏᑦ 1990ᑦ, ᓂᐊᑉ ᐃᓚᖏᑦ ᐊᐅᓪᓛᓂᕐᒪᑕ ᓅᑦᓱᑎᒃ ᑰᑦᔪᐊᒥᑦ, ᑌᑯᖓ ᓄᓇᓕᐊᕈᕐᒧᑦ ᐅᖓᓯᑕᖓᓄᑦ ᓯᕿᓂᖓᑕ ᓄᓇᐅᑉ Saint-Lin-Laurentides ᓄᓇᖓᓄᑦ. ᑌᑦᓱᒨᓇᐅᑎᓪᓗᒍ ᐱᑦᓴᕋᓱᐊᕆᐊᖃᕐᓇᓯᒪᕗᖅ ᓇᓪᓕᐅᓂᖓ ᐃᓅᓯᖓᓄᑦ ᒥᑭᔫᖏᓐᓈᓱᓂ. ᑖᕙᓂᒥᐅᒍᓕᕋᒥᒃ ᓄᓇᓕᐊᕈᕐᒥ, ᓂᐊᑉ ᓯᕐᓕᕿᒍᑎᖃᕐᑐᕕᓂᐅᕗᖅ ᐊᑦᔨᐅᑎᑕᐅᓐᖏᓂᕐᒥᒃ. ᓇᐅᓘᓐᓃᑦ ᑐᑭᖃᓚᑦᓯᑎᓐᓇᒍ ᓇᓗᒧᑦ ᐃᓄᐃᑦ ᐱᐅᓯᖓᓐᓂᒃ. ᑕᒐᓗ ᐃᓕᓐᓂᐊᕕᒻᒥ, ᑖᓐᓇ ᑕᑯᒥᕐᕈᐊᒍᖃᑦᑕᓱᓂ. ᑕᒪᑐᒪ ᐱᔮᓄᑦ ᐃᓂᓪᓚᕕᐅᑦᓱᓂ ᐃᓕᕋᒃᑯᑎᓂᕐᒥᒃ ᐃᒃᐱᓂᕈᑎᖃᕐᓱᓂ ᐱᐅᓯᕐᒥᓄᑦ ᐃᓅᒋᐊᖅ ᐊᒻᒪᓗ ᐃᒃᐱᒋᓕᕈᑎᖃᕐᓱᓂ ᐃᒫᒃ ᑕᒪᓐᓇ ᐱᐅᓂᕐᐸᐅᕗᖅ ᐃᔨᕐᑐᐊᕆᓗᒍ ᐊᓯᑦᑎᓂᑦ. ᑕᒐ ᐅᓇ ᑐᑭᓯᓇᕈᑎᖓ, ᑌᒪ ᐃᓚᓐᓈᒥᓂᒃ ᐳᓛᕐᑕᐅᓕᕋᒥ ᐊᓂᕐᕋᒥᓂ, ᑖᓐᓇ ᓂᕆᑎᑦᓯᖁᔨᑦᔭᒐᓂ ᑐᒃᑐᕕᓂᕐᒥᒃ ᐅᒃᕙᓗᓘᓐᓃᑦ ᕿᓚᓗᒐᕕᓂᕐᒥᒃ. ᑖᓐᓇᓗᑦᑕᐅᖅ ᐅᖄᑦᑌᓕᑦᓱᓂ ᐅᖃᐅᓯᕐᒥᓂᒃ ᐃᓄᒃᑎᑐᑦ, ᐊᒻᒪᓗ ᐱᖃᕈᒪᖔᕐᓱᓂ ᓂᐅᕕᐊᕕᓂᕐᓂᒃ ᓂᐅᕕᕐᕕᓂᑕᕐᓂᒃ ᐊᓐᓄᕌᓂᒃ ᐊᑐᓐᖏᖔᕐᓗᒋᑦ ᐊᓈᓇᑦᓯᐊᒥᑕ ᒥᕐᓱᒐᖏᑦ.

ᑌᒪ ᑖᓐᓇ 18ᓂᒃ ᐅᑭᐅᖃᓕᕋᒥ, ᓂᐊᑉ ᑲᑎᓯᔪᕕᓂᖅ ᐊᓯᒥᓂᒃ ᐃᓅᒻᒥᔪᓂᒃ ᓄᓇᕗᒻᒥᐅᓂᒃ ᑌᑲᓂ ᐊᑐᒍᐊᒥ, ᐊᒻᒪᓗ ᖃᐅᔨᑦᔫᒥᓕᕐᓱᓂ ᓱᓇᒥᑭᐊᖅ ᐃᒫᒃ ᐃᓚᑰᒍᑎᒥᓂᒃ ᐃᓅᓯᕐᒥ. ᑌᑲᓂ ᐊᑐᒍᐊᒥ ᖃᐅᔨᓕᕐᑐᕕᓂᖅ ᓄᓇᓕᓐᓂᒃ ᐃᒫᒃ ᑲᑕᑦᔭᓲᓂᒃ ᐊᒻᒪᓗ ᐅᖄᑦᓯᐊᑐᐃᓐᓇᓲᓂᒃ ᐱᐅᓯᕐᒥᓂᒃ ᐃᔨᕐᑐᐊᕆᓇᒍ ᐊᒻᒪᓗ ᑭᓇᐅᓂᕐᒥᓂᒃ ᐅᐱᒋᑦᓱᒍ ᑖᑦᓱᒪᐅᑉ ᖃᐅᔨᓚᐅᕐᓯᒪᓐᓂᖏᑦᑕᖓᓂᒃ.

ᑌᑦᓱᒨᓇ 2005ᒍᑎᓪᓗᒍ, ᓂᐊᑉ ᐃᓚᐅᕕᖃᕐᓂᖁᖅ ᐱᓱᒃᑐᓂ ᖃᐅᔨᒪᔭᐅᑎᑦᓯᒋᐊᕐᓂᒥᒃ ᐱᓀᓗᑌᑦ ᐱᔮᓄᑦ ᐊᑐᕐᑕᐅᔪᑦ ᓄᓇᑐᕐᓕᓕᓐᓂ ᑕᒫᓂᒥᐅᓂ ᓄᓇᓕᖏᓐᓂ. ᑕᒪᓐᓇᓗ ᐃᓅᓯᖓᓂᒃ ᐊᓯᑦᔩᓚᕿᑎᓪᓗᒍ. ᑖᓐᓇ ᐱᓱᑦᓱᓂ ᐃᑎᑦᔭᓱᒍ ᑲᓇᑕ, ᐱᒋᐊᕐᓱᓂ Vancouver ᓄᓇᖓᓂᑦ ᑎᑭᑦᓱᒍ Ottawa ᓄᓇᖓ, ᐃᓚᖃᕐᓱᓂ ᑌᒫᒃ ᐃᓱᒪᖃᖃᑎᐅᒻᒥᔪᓄᑦ ᐅᕕᒐᕐᑐᓄᑦ ᑕᒪᓂᒥᐅᑐᖃᕐᓄᑦ ᓄᓇᒥ. ᑌᒣᒋᐅᓕᕐᓱᓂ ᐃᓅᓕᕐᓂᕋᒥᓂᑦ ᑖᓐᓇ, ᓂᐊᑉ ᖃᐅᔨᒋᐅᕐᓱᒍ ᑕᒫᓐᖓᑐᐃᓐᓇᖅ ᐱᑦᔭᖏᓐᓂᒥᓂᒃ ᐃᓂᓯᒐᒥ. ᑕᒪᑐᒪᐅᑉ ᐊᑦᓱᑦ-ᑭᓐᖒᒪᓇᕐᑑᑉ ᐃᖏᕐᕋᓂᕐᒥᑕ ᐃᓗᒥᒍᑦ ᑐᐸᑦᔫᒥᒍᑎᖃᕐᓱᓂ ᐃᒫᒃ ᑕᓯᐅᕐᓯᔭᐅᒍᑎᒋᓕᕐᑕᕕᓂᖓ ᑕᒐ ᐃᓱᒪᒋᐊᑦᓯᐊᕆᐊᕐᓂᒥᒃ ᐃᒫᒃ ᐊᔪᕐᓇᑐᕐᓯᐅᓇᕐᒥ ᐊᑐᕐᓱᒍ ᐅᕕᒐᕐᓱᓂ, ᑌᑰᓇ ᑐᑭᖃᓚᑦᓯᒐᓱᐊᕐᓱᓂ ᑐᑭᓯᒍᒪᑦᓱᒍ ᑭᓇᓪᓗᑑᒻᒪᖔᕐᒥ.

ᓂᐊᑉ ᐅᑎᕐᑐᕕᓂᖅ ᐊᓈᓇᑦᓯᐊᒥᑕ ᓄᓇᖓᓄᑦ ᑰᑦᔪᐊᒧᑦ ᐃᓕᓐᓂᐊᕆᐊᑦᓯᐊᕆᐊᓕᕐᓱᓂ ᐅᖃᐅᓯᕐᒥᓂᒃ ᐊᒻᒪᓗ ᐅᑎᕐᑎᒋᐊᓕᕐᓱᒍ ᐃᓅᒐᒥ ᐱᐅᓯᕐᒥᓂᒃ ᐊᒻᒪᓗ ᑭᓇᐅᓂᕐᒥᓂᒃ. ᑌᑦᓱᒪᓐᖓᓂᐅᓕᕐᓂᒪᑦ ᑕᒐ, ᑖᓐᓇ ᐱᓇᓱᐊᕐᓯᒪᓕᕐᑕᒐ ᐅᖃᐅᓯᕆᑦᓱᒍ ᑕᒪᓐᓇ ᑭᓇᐅᓂᖅ ᑖᕙᒃᑯᓄᖓ ᓯᓚᕐᔪᐊᒦᑦᑐᓄᑦ, ᐊᒻᒪᓗ ᐱᒐᓱᐊᕐᓱᒍ ᐃᓅᕕᒋᓗᒍ ᐊᒻᒪᓗ ᐱᕈᑦᓯᐊᓗᓂ. ᑖᓐᓇ ᓱᓕᐅᒻᒥᔪᖅ ᐃᓕᒋᐊᑦᓯᐊᓱᓂ ᐃᓚᓗᐊᓐᖑᐊᖏᓐᓂᒃ ᓯᕗᓕᕕᓂᕐᒥᑕ ᐱᐅᓯᕕᓂᖏᓐᓂᒃ ᐊᒻᒪᓗ ᐃᓅᒍᓯᖏᓐᓂᒃ ᐱᐅᓯᕆᑦᓱᒋᑦ. ᑌᑰᓇᑕᒐ ᑕᒪᑐᒪ ᐅᑎᕐᓂᒥᑕ ᓄᓇᑐᖃᕐᒥᓄᑦ ᐃᒫᒃ ᐱᓇᓱᐊᕐᓂᖓ ᐱᓇᓱᐊᕈᒪᔭᕐᓱᓱᓂ ᓴᓇᓐᖑᐊᓂᕐᒥᒃ ᐱᒋᐊᓕᕐᓂᖁᖅ ᐃᓗᖏᕐᑐᑐᒥᒃ, ᓄᐃᑦᓱᒍ ᐱᔭᒥᓄᑦ ᓄᓇᓕᒻᒥᓂᑦ. ᐅᓪᓗᒥᒧᑦ ᑎᑭᑦᓱᒍ, ᓂᐊᑉ ᑲᑕᑦᔭᓲᒍᕗᖅ, ᓯᕗᓪᓕᐸᐅᑎᓪᓗᒍ ᐱᓐᖑᐊᕈᓯᖅ ᓇᓗᓀᕐᑕᐅᔪᖅ ᐃᓕᑕᕆᔭᐅᔪᑎᒍᑦ ᓇᓗᓇᕐᑐᖅ ᕿᒻᒪᖁᓯᐊᖅ ᑯᐯᒃᒥ.

ᐃᒻᒧᐊᒍᑦ ᓂᐊᑉ ᐱᒻᒪᕆᐅᑎᓪᓗᒋᑦ ᓴᓇᒐᖏᑦᑕ ᐅᓇᐅᕗᖅ 2018 ᐃᓂᓪᓚᑕᐅᓂᖓ ᑌᔭᖅ ᑲᑕᔾᔭᐅᓯᕙᓪᓛᑦ Katajjausivallaat, le rythme bercé, ᑖᓐᓇᓗ ᑕᒐᑕᒐ ᑲᑎᕐᓱᐊᓃᓕᕐᓱᓂ ᑌᑲᓂ Montreal Museum of Fine Arts. ᑌᑰᓇ 2017ᒥ, ᐊᓪᓚᖑᐊᕐᒪᔭᖓ ᓂᐊᑉ ᓇᓪᓕᑳᕐᑕᐅᔪᕕᓂᖅ ᑖᒃᑯᓄᖓ Canadian Museum of Nature, ᑖᒃᑯᐊᓗ ᑎᓕᔨᔪᕕᓂᐅᑦᓱᑎᒃ ᓴᓇᒋᐊᓪᓚᓯᐊᖁᔨᑦᓱᑎᒃ ᐊᖏᔪᓕᐊᕆᓗᒍ ᐊᑭᓐᓇᒥᐅᑕᕐᒥᒃ ᓄᐃᑕᕙᓐᓂᐊᓕᕐᑎᓗᒍ ᐊᑭᓐᓇᒥ ᑕᑯᔭᒐᖃᕐᕕᒥ ᐅᑭᐅᕐᑕᑐᒧᑦ ᐱᔪᓂᒃ. ᑖᓐᓇᓗᑦᑕᐅᖅ ᓱᓕ ᐊᐅᓚᔫᓕᐊᒍᑦᓱᓂ ᐃᓄᑦᑕᕆᔭᐅᑦᓱᓂ 2020ᒥ ᑯᐯᒃ ᑕᑯᔭᑦᓴᖏᓐᓂ ᑕᓚᕖᓴᒃᑯᑦ ᐃᓚᒃᖁᐊᕇᓂ ᓄᐃᑕᑎᑕᐅᔪᓂ Epidemicᒥᒃ ᐊᑎᓕᓐᓂ. ᖃᐅᑕᒫᑦ ᐅᓪᓗᑕᒫᑦ, ᓂᐊᑉ ᑲᔪᓯᕗᖅ ᑐᓴᐅᒪᔭᐅᑎᑦᓯᓱᓂ ᓲᖑᔫᓂᖓᓂᒃ ᐊᒻᒪᓗ ᐱᐅᔫᓂᖓᓂᒃ ᐱᐅᓯᑦᓴᔭᕐᒥᑕ, ᑌᒫᒃ ᐅᕕᒐᕐᑐᐃᓗ ᐃᓄᒻᒪᕆᐅᓕᕐᑐᓗ ᐊᑦᔨᒌᒥᒃ ᐃᓕᑦᔫᒥᓂᐊᕐᒪᑕ ᖁᕕᐊᓲᑎᖃᕐᓂᒥᒃ ᐊᑦᔨᒌᑦᔭᖏᑦᑑᒐᓗᐊᓂᒃ.

“ᑌᒪ ᐃᓅᓯᖅ ᐱᔭᕐᓃᑐᐊᓘᑐᐊᕐᐸ, ᐃᒃᖃᐅᒪᓗᒍ ᐃᒫᒃ ᑌᒣᖏᓐᓇᓂᐊᑦᔭᖏᓐᓂᖓᓂᒃ ᑖᕗᖓᓕᒫᕌᓗᒃ,” ᑖᓐᓇ ᐅᖃᕈᒪᓲᒍᕗᖅ. “ᑲᔪᓯᖏᓐᓇᕆᐊᖃᕐᑐᑎᑦ. ᓇᓪᓕᐅᑎᕋᑕᕐᓂᐊᒪᑦ, ᖃᐅᔨᑦᓯᐊᓂᐊᕋᕕᑦ ᐃᓕᓐᓂᒃ ᓇᓂᓗᒍ, ᐊᒻᒪᓗ ᑕᒪᓐᓇ ᐱᒍᓐᓇᓯᒍᑎᒋᓂᐊᕐᓗᒍ ᓇᓪᓕᐊᒎᕈᒪᒻᒪᖔᕐᐱᑦ ᐊᒃᖁᑎᒋᓂᐊᕐᑕᓂᒃ.”