Jean-Marie Aubin

Jean-Marie Aubin nomihqosuhpon 1928 nit Saint-Leon-le-Grand, Kepek. Mihtaqsol Wolastoqew (Maliseet), naka wikuwossol olu Kepek toley. Mesq kisitposihq Mahkiyew Sakom ‘ciw Maliseet (tokec Wolastoqiyik Wahsipekuk) Amsqahsewey Skicinuwihq, neke 1987, Jean-Marie Aubin li nonaqsuhpon tahalu nucihket, nutamet, kcihq keseltok, naka nihtawi amalholuhket. Apeq wisoki somahtuwiw, Jean-Marie mate wihqaci witokehkimsiw. Ehqi witokehkimsu ewasisuwit. Etucitahatok nucihkewakon apc moskomon amalholuhkewakon, naka ‘kisihtasinol layyektakonol. Sipkiw, ‘t-assihqal Ehpilicil oc nihpumat nit Montreal, and kisnumon wikuwam nit Longueuil nit oc neqtakutomuwey eyik wik. Qenluhket sipkiw, Jean-Marie mate tehqoluhkatomuwon piwsoq.

‘Kisi nisluhkamal nuci-amalhapskihtihiket Louis Archambault, naka wiciw mawuhkacik kisihtutit Place Dupuis, Montreal kinikanik. Pomawsuwinuwok litahasultuponik kisi tehp nekom kolowosit nucihket.

Qeni skinuhsuwit, Jean-Marie wihqatamehpon ewehkahat lapektuwakon, kakehs ‘potha polamu ehtahsi kiskahk. Wihqaci kotunke tena. Koseltomonehpon lapektuhusuwakon, naka itomuhtuponik tan tehpu nihtawehtun lapektuhusut tehpu skat violin. Mehtlukhotimk, wihqaci lipha lahtoqehsonuk weci nokotok psiw keq. Qocomiw wicuhkemkun weci pskok tetpeyik. Sipkiw, Jean-Marie onsa ‘’nisonul ‘pomawsuwakonol,’’ ‘katun eli Skicinuwit. Mate uskuhutomuwon eli Skicinuwit kosona ‘t-owehkawon ‘tolatuwewakon, skat kisokehkimuhk nekom. Yut stehpal “nisonul pomawsuwakonol” lessu ‘ciw pomawsuwinuwok eyihtit eli nonaqsultitit skat tepeltomuhtiq nekomaw.

Jean-Marie nican moskomoniya etoli kataq neqt meskomuwahtit skicinuwi tolehpol lamiw wihqacqehtikonok. Apeq ‘palitahatomoniya mihtaqsuwa wetapeksilit, ‘pawatomon skat kcicihtasiw. Naka ‘cel peciw, pesqon mehsi Jean-Marie kataq qinte-te eleyik litahasu ‘t-ankeyuwa nican. 

Apeq toli sesomitahasu, Jean-Marie miyawhukehpon naka wihqatelomuhpon. ‘Kisehtasin ‘t-iyan nican kinaq pesqon wihqitaqok ehtahsi-kiskahk. Koseloma neqtakumaci, skicinuwihkuk nucihtasit, naka miluwet, psi tama wisokitahamqosit psi wenil kecitomitahamat naka tena wisoki tawi kolultiket.

Neqt, Jean-Marie mosonomon pomawsuwey-acessik wikuwamkakon. Nisuwok Aponahki skitapiyik toleyak Wolinak, Nuwel naka Piyel Saint-Aubin, ‘kisacuyawal Jean-Marie wol etoli putuwosimok kisi wihkutomuhtit Wolastoqey Skicinuwihq weci skuhutomuhtit qeckutikonol eyihtit.

Neke, Wolastoqey Skicinuwihq (tokec Wolastoqiyik Wahsipekuk Amsqahsewey Skicinuwihq) pomi mehcine naka mace ksihkahtuniya eleyimkil. Weci monuwehkehtit, cuwi op wewinuwak tahalu Kepek ‘qotankuwewey Skicinuwihq. Jean-Marie kisiwiya Mahkiyew Sakom. Wiciw wicuhkemiht nisuwihticil naka nican, naka olonahqapisey wikhikon, on ehta naci yali kiluwahan piluweya Wolastoqi Skicinu sissepicik psi-te tama neqtuhkomikahk. Neke 1987, ‘qotatq kehsiwok kisi putuwosicik Riviere-du-Loup weci pkonahtit sakom naka putuwosuwinu. Nisikoton tuciyak, neke 1989, Wolastoqiyik qinte-te wewinakuwa Kepek National Maqehewik. Jean-Marie Aubin mehcine nokosayiw neke.

Yukt woli nonuwahtitpon mihqitahatomoniya Jean-Marie eci sikoluhketpon minuwihtasik skicinuwihq. Kat nit luhkewakon ‘ciw nekom, ‘ciw nit piluweyak. Jean-Marie kocicihtunehpon eci wisokokimqok weci apaciptasik nekomwey skicinuwey eleyimok, naka mate kipahpuwatomuwon ‘t-olluhkewakon. Tahalu mecimiw, kat nit nekom ‘kinsonuwakon: ‘kisi asitewtomon keqsey piyemkiqok katok nekom. Jean-Marie Aubin kisluhkatok meciw ote oc wewitahatasu, naka wahsenomakon kisi miluwasu ‘ciw yukt weckuwapasicik. Mesq mecinehq, kisi yuhukun etucitahatok kisi olluhket—wolitahasu kisassiqat piluweya nihkanatpahtilit skicinu, eci wollasihqahtit, naka, ciliw, malom-ote moskomon qinte eli nonaqsit.