Karine Awashish

E arimotcikatek nikanisiwin, itertakon e wetak, nama orina wetan, arimatc nokinanion mamiskatipinanion pamitonermitonanion. Kitci tacikasonaniwok e kanawapatcikatek ki kiskinoweweritisowiin kaie otamirowinik meskano kata apitan kitci miro oriparitananiwok ka nikaninaniwok. Ni tapweriten kaskina kirano e takok nihe. Pitama aric, arimatc ki ka kwetcimitisonano kaie ki ka miro nisistenano tan e itemikak e takok nikanipiwin kekotc e nikanipinaniwok. Ka nikanitertamowin nihe, kirowe mekwata nit iteriten e micta apitcitakiniwok mitcetwa. Nit iteriten e mitoneritcikatek e nikanpinaniwok kekotc e takok ka tiperitcikatek iskwew otci ni apitc 2022 ekoni pekon e ici arimomakinisan iskwew weckatc 1900. Nama tapwe kekocic meckotciparin. Awik e nikanipitc, patama ki kickitimatisotc wir tipiriwe opimatisiwin, otamirowinik kaie otenamik e pimatisitc. Ni niherten e witaman e miro nikanipitc awik, kitci pitama niherimitisotc ; kitci miro otamirotc kaskina awia nehirowisiwa otci ; kaie awik ka kicteritakositc kaie ka kackitatc kitci mamowinatc kaskina awia otenamik tapickotc kitci otamirotatcik otenamik otci. Kicterimitowin, kictertcikewin, miro tapaskonikewin. Nit iterten awik e nikanisitc kata micariw omitonertcikan kaie mocak kata otamirotaw kitci tatak.

Kecpin oski kinowapamitisowan kaie ni meskinam, nit iterten kiskinoweweritisowin e mitahan ni ki kore witcihikon awacimec warawik kitci icahian ni pimatisiwinik. Kaie matci kata miro kaskeritakon mitcet tato kickwa ka ici itotiskaniwok, mitowi e nta pimotaniwok warowik mikiwamik. Icaniwok kirowe warowik, amatciwonaniwok, e miskatek notcimiwa, otenawona kekotc miskatek ocki meskino, ekoni mitowi e ici pacitciparinaniwok. Nin otci, e mitaniwok mocak pitama tipirawe kirano ici miparin kaie ka ici tiperitamekw, mitowi e moctenakatek kitci nta kanawapakaniwok. Nama kata ki atoweritcikatew nehi totamowicina. E pe ototeian Opitciwanik, Atikamekw askik, ni ki papimiparin mitcet meskanawa kitci pe takociniian ka ici tacikeian enkweriw tca aci kotakahi meskanawa e ceparik nikanik. Les opportunités kaki mirikowan kaie kaki otapinaman, nama kitci natcictwakowin ocoriaw, ni kanewian eki micta otamirowan. Kiskeritamowin ni wapitarikon e miroparik matisiwinik aka e pontaniwok e tapwewerimitisonaniwok. Mocak e atciian kaie e natowi kaskeritaman, ni ki mirikowin kitci aicaian Suisse, Brésil kaie Tunisie. Warowik kore ka pe ototeian, ka awacian ni ki mawotci kwetcitan e kaskeritaman waskak Québec kaie kotakahi nehirowisi askik. Kecpin e papapimatisiian, mocak ni mamitoneriten kekwan kaie kaskina awik ka waskackakowan. Ni micta tca sakitan e nakeckakian kecpin wec aican. 

Mocak kirowe e natowi kaskeritaman kaskina kekwan ota askik, nin tipiriwe ni nikanisiwin ka nosanetan kekwan ka nataweritaman. Aric tca kirowe osam e tapweritaman, esko e awacian, e kiskinohamasonaniwok ni witcihikon ni meskinanak ka ici otamirowan kaie nin otci. Mocak ni ki wi ican warowik, nama ceckwat ni ki ocitan ni kiskinohamato masinahikan. Nama aric nit iterimitison e wi kwetciskatakean e kaskihinomasowan osam e iti aitaian. Tepirak ni meskinam ka ki nosinetaian ni ki pe icirikon ote. Ni kiskeritamowin kaie e natowi kaskeritaman ki otenamino mamo witcihitowin, ni ki matceken masinahikan ke nosinetakiniwok wir tipirowe nehirowisiw kitci mihitatc Atikamekw opimatisiwin kitci miroparik ki otenamino otci. E micta otamirowan, mocak ki takon e mirertaman kitci ocitasowan kaie atcitasowiian ; eko osam mamo otamirowin ka pe otcipitikowan/ciemihikowan mitcetowaw pipona kaie wewerita e wi kaskeritaman e manikaniwok mamo otamirokamikok kaskina Atikamekw iriniw/iskwew kitci miro matcihitotcik ni mirikon. Ni nakasin kirowe kitci kwetcitan kaskeritamowin kaie kitci witci otamirowan kaskina ni witci nehirowisiwok Québec kaie Labrador.

Aci mitato pipona ka matcekaman nit otamirowin, tipiriwe matcihitowin nehirowisiwok otci. Ka ki ici kitcikaskihinomasowinik (maîtrise), osam kekwan e kaskeritaman ni ki witcihikon kitci pamitonertaman kaie kitci ocitaian orasinahikan kitci witcitcikotc nehirowisiw opimatisiwinik kaie itekera kicteritakosiwin, ka icinikatek kaie ka wi miro matisinaniwok tapickotc mitowi ka kicewatisitcik e ki kiskihinomakowekw. Ni kiskerten miro masinahikan ke apatak kaskina nehirowisiwok otci. Ni ki matceken, ki apatan ni miro mitonertcikan e nikanisian. E ki pe otamirowan kirowe kit iti miro kaskerten kaie kirowe ni ki iti sakitan mamo witcihitowin nehirowisi matcihitowin kaskina Nehirowi Otenak ote Québec kaie kaskina wiec. Tapickotc e aictaian ni kaskeritamowina kaie nataweritamowin, ni ki ocitanan Coop Nitaskinan, anihe otamirowin nitwertakoniw kitci wectatc otamirowiniw nehirowisi pimatisiwin kaie kitci matcitatc wir tipiriwe otenamik otci. Nta mireritenan kitci miroparik kotakahi mitcet atamitowin e nokoki kaskina wiec mitowi nehirowisi askik kaie otenawa, matci karak waskok askik. Miro sapinakon nehe coop kaie nama takon iskwaskohikan tepirak nekik ka miwotatcik, wirawaw kata tapertamok kekwan matci ke icinakok. Mirowinakon a e ici wapitcikatek kitci miro kictatcik awenak ? Epwamici kitciparik ka wi ici kitcikaskihinomasowinik (maîtrise), aci ni mamitonerteti kitci natowi nisistaman kekwan mamo orakonikewin kata miro apitan nehirowisiwok otci kaie nikanik ke ici mamitonertakik. Ni mictenen kitci wapitaman tan ke ici miro miwotatc nehirowisi pimatisiwin nit otamirowin kitci apatak mamo kaskina nehirowisiwok. Aric kirowe kiapatc, ni wapaten mekwat ni meskinam mitowi nictam ka otamirotaian masinahikan nac e kipitanaman ni kiskeritamowin nehirowi witcihitisowin otci kaie kitci miro otamirotatc anihe masinahikan nehirowisiw. Ni wi otamirotan kekwan ke ici takoki e kaskihinomahakaniwok kaie ka ici kiwe kaskinowetasowin kitci witcihitonaniwok nehirowisi pimatisiwin, orakinikewin kaskina mamo otci otenak. Nit iterten e nanto kaskeritcikatek kaie kiskerimotariwewin ka kictapatak witcihiwewin mamo otci kaie ke iti matcihitotcik nikanik. E ici micta otamirowiian e manitokason kirowe warowik kitci icaian, enko osam e pe otcipirik ka nikanisian. Nama weckat ka ocitaian ohwe kaie nit iteriten kirowe kecpin kitci nikanisian, pitama ki ka otamirotanano otci kirano kaie ki matisiwino.

E nehirowisi iskweian, ni takickakon kaie ni kiskinowertamihikon otamirowinik itekera kaskina nehirowisowok opimatisiniwaw. Ni tapwerten kaie kaskihinomasowin kicteritakon kitci miro matisitcik nehirowisiwok, enko wetci e ki nta kaskinomasowan kitci irapitcitan kackitawin kaie arotakanak. Irikik ka kasninomasowan, ni ki taciken papitoc itotiskewin. E otci otamiromakik awacak (kaie ka kiciwatisitcik) ni micta miro witcihikon, osam nit iterten e kicteritakok kitci aniskehew kiskeritamowin. Ni ki miritison kitci witcihakik, nin ka wi ici totaman, mosoweritamowin ican warowik pimatisiwinik. Ekote patoc e ici oreritaman otci ka kitcinakok ocitasowin kaie kitci mickowak nehirowisi pimatisiwin, kitci miro matcihitotcik, ki pe mitceno nit otamirowin.Misowatc ekockatc e ntowertaman kekocic ka ici otamirotaian, ni kaskeriten e atcikehian ni mirerimowin. Nac ni ki kaskeriten e waskackowew ka ici otamirotan miro awikak ka wi natowi meckotamotcik aski, mitowi nin. Atikamekw Pimatisiwn, mitowi kaie e ici matisiiak. E icinikatek askik kata apitisiw otapi kicteritakosiwin, ki nehirowisi pimatisiwino kaie nikanik e ici wapitamok ki ka mamowipitenano acitc nitaskinan kaie e ici taciketc iteker kiskinorowewin neheriw ni otcirowemakanak ka micta kacteritaman. Nehe mamowinitowin acitc aski micaw ka pe otciparik kiskeritamowin ni micta miro witcihikon. E tapwerimitisowan ka wapitaman kaie e ici pe ototeian kicteritakon otci e ici motean (actions). Mirerimowin ka miwotahan, ni wi miraw/wapitaraw/witamowaw ni otenam kaie kirowe nikosis, niaran piponesiw. 

Kitci miro mackowisiian kaskina ka ici otamirotahian, ka ocitaian, ni micta takickakon mackiki arapitak, kirowe ka icinanok wawiesinahikan askik mitcet kictatisiwin. Miskatew mocak kakitawewotakon nictam pimatisiwin nac tapwertamowin, itertamowin, omitanertamowin kaie owiaw. Ka ici wapitaman, ni ici aspitcin kicteritakosiwinik kaie tapotowerimitowin papimohorikon otci ka saperitaman kaie ka sakitan nama soka e mininmakowan ka koctaman, kaie ohwe e actaian osam ni mataweritamowin. Ni mackiki aripikorim, kakitaweritakon otci itewina, ni kika mirikon kitci mackowerimowan kaie kitci konertaman kinec e miro iterimowan ni meskinamik. Tekici miro irinisiwinik, ni tapweriten patoc ni kackitawin e nikanisiwin ni kacterten ni otamirowin kaie mocak ni ka miro otamiron nehirowisiwok otci. Kitci kinoweritamekw ka nikanipiekw ici actew pekatisiwinik. Arimatc kata miro mihitisonaniwon epowamoci mihakitcik kotik awik. Patam kitci nakatoweritamekw ka ici saperitamekw epwamoci matci saperitamihekw kotakahi. Kaie kirowe arimatc tacikikasomakan kitci meckotcipariin kaie kitci meckotcitahin aski, misowatc kirano waskak, ki tcirowemakanak, ki nehirowi otenaminak, kitaskino matci kaie ohwe askik kirano ka ici tacikeiekw (Kanata). Tato e moteian witcitaw e maskowisimikak ni sokitehewinan, ni kitimakeritcikewinan kaie ni tiperitamowinan kitci kinowamitisowekw, kotakahik otci, kaie cowatc. Kaie tekaci nama kaki kipitinano awik kitci itikowekw awin ni kirano, osam kirano tepirak ki kaskeritenano.