Skawennati

Shé:kon! Skawénnati niwakhsennò:ten. A’nó:wara niwaki’tarò:ten. Kanien’keha:ka niwakonwenhtsyò:ten. Kahnawa:ke nitiwaké:non, nek tsi Tiohtia:ke kì:teron. Ieráhstha ne Skawénnati Kahnawà:ke iakonakerá:ton tsi ratí:teron ne Kanien’kehá:ka, iakoniáhton. Iakohiatonhserá:ien ne Fine Arts Concordia University Tiohtiá:ke iakoteweiénston, tsi nón:we nón:wa tié:teron. Ne shiieksá:’a ne Skawénnati Kahnawà:ke tie’terontáhkwe tsi tiakonónhsote ne teioihsotsherá:ne, Kanien’kéha tekenitharháhkwe. Shaaiéheie ne ohsótha Chateauguay, Quebec ionsaióntien ne Skawénnati, nikanatá:’a iah í:non té:ken ne Kahnawà:ke.

Ken’shitiakoión:’a ne Skawénnati tiókonte se’ ierahstá:nions. Tho se’s ní:ioht tsi teiontate’nikonhrawén:rie. Ohén:ton ne tewáhsen shaeié:rite, iah teiakawé:ron “kaio’ténhsera” ken tsi ieráhstha, nek tsi iakoterientaráhkwe tsi í:ienhre nia’té:kon aiakón:ni. Thóne ki’ Concordia University iaontatshennínion’te aionteweiénste aié:rahste tánon waenonión:ni tsi waerahstá:nion. Ne ionterihwaienstáhkhwa sénha waako’nikonhrá:reke í:si’ nón:we naierahstá:nion ne oieron’ta’shón:’a tánon ne thé:non.

Ne Skawénnati ne tiakawehtáhkwen tóka’ í:sehre ahsaten’nikonhró:ri tsi aesaió’ten, í:tsehr ki’ nahò:ten sahró:ris ne seriá:ne, éntewe ki’ nahò:ten sahská:neks. Tóhsa nonwén:ton ionkwáhteron’ aetewate’nién:ten thénon ne orí:wase, tóka’ ni’ tahsa’nikonhrhá:ren iah tiekaié:ri tsi nahswistí:sa: ne tkaia’takwe’ní:io aetewatshén:ri oh ní:ioht ne kaio’ténhsera aion’wesénhake, iaetewáhsa nahò:ten entitewatáhsawen.

Waé’ron ne Skawénnati karí:wes ne wa’tiakotáhste tsi niiawénhseron ne shahón:newe ne ratihnará:ken iah óksa’k teiakorihwakweniénston ne tsi nihotirihò:ten ne Kanien’kehá:ka. Tsi ki’ niawén:en tsi róti kénthon ne Ohontsakaionhró:non, iah ki’ teionéhrakwa tóka ótia’ke ne Onkwehón:we iah akwé:kon teiakoterién:tare ne raotikara’shón:’a tsi nontaiawénhsere, iah ó:ni teshontá:ti shakotihsothó:kon raotiwén:na. Nek tsi í:ienhre taierihwáthe’te tsi iah se’ sénha kà:ron thahshia’tó:ten tsi Sonkwehón:we. Teiotenonhwerá:ton’t tsi iah teionkwa’niskó:on’ ne á:se aetsitión:ni ne tsi niionkwarihò:ten ne Tionkwehón:we.

Skawénnati ionkhikaratón:nis ne Skén:nen Rón:nis oká:ra, wahón:nise ren’terón:tahkwe washakohwe’nón:ni ne Wísk Nihononhontsà:ke Kanenhrakwe’ní:io (Iroquois Confederacy) wahonnitiohkón:ni. Ronhátien ki tsi ronteriióskwe, é:se ne shahotiká:ra tánon shahatiwén:na. Tsi nahò:ten rawé:ron ne Skén:nen Rón:nis né:ne ahonatiohkowáhnha: ratikwékon sha’tontahshakotí:tate, tsi ní:ioht ne kahwà:tsire. Ne Skawénnati akorihwá:ke iah kí:ken teiokarakaión:on’ né:ne thénon aionkwarihón:nien ne ónwa wenhniseraté:nion.

Iako’nikonhrá:reks nahò:ten iakoteweiénston ne tsi ionterihwaienstáhkhwa tánon ne tsi niiakorihò:ten, taiontáhsawen ne Skawénnati aiakón:ni ne teió:ia’ks machinima waenatónhkwe. Shá:rawe ne Skén:nen Rón:nis, waonnonhtonniónhwe tsi naiá:wen’ne ónwa nikahá:wi’s taontá:re ne Skén:nen Rón:nis ia’tekaiéston tsi niiá:wens ne shaoié:ra. Kí nón:wa nikahá:wis iah thénon tetsorihwí:io tsi nientsá:wen aetewanonhtonniónhwe nahò:ten iotohétston aetewén:ron ki’ ionénhrakwa tsi shékon kén:en í:tewe’s.

Iah thénon tewatsterístha nahò:ten iakoió’te ne ne Skawénnati, thénon iakoráhston, teió:ia’ks, onia’taraashón:’a, aionhkaratáhko, ne akoio’ténhsera watié:sen tsi ahontkátho ne ratiksaokón:’a tánon ne nithotiión:sa. Ne ohén:ton ié:tats ahonwati’nikonhrá:reke ne Onkwehón:we nithotiión:sa ahotirihowanén:hake nahò:ten ronohétston ne ronwatihsothókon. Orihwí:io iakón:nis tsi ia’teieiéstha tsi nahò:ten iakoio’te, eniontsnié:non ki’ sénha enhati’shátsten’ne.

Ne ratinón:we’s ne karáhston iotkáthon ne tsi niiohóntsa ne Skawénnati akoio’ténhsera tánon akokara’shón:’a ne tsi takenhá:tie, tsi nientsá:wen’ne tánon tsi teiotténion tsi iontkáthos ne kanatowá:nen ié:teron Kanien’keháka iakónkwe tánon waterihwateweién:tons aottokhátshera ne kaia’tón:ni (avatar). Iakoientá:on ne iontaterihwakweniénston doctorate Minneapolis College of Art and Design thonatká:wen, ieiá:tare ni’ ó:ni ne Guild of Future Architects, tánon tiakotáhsawen ne daphne aotinén:ra, Onkwehón:we ratiráhstha centre ne Tiohtià:ke. Iontsniénons ni’ ó:ni tsi ronnón:nis ne Aboriginal Territories in Cyberspace, ratirihow’kwats-ronnón:nis karihowanátha Concordia University tiotahshá:ronte.