Monique Nolett-Ille

Monique Nolett-Ille aln8baïb Odanak pab8miwi ngwed8mkwaki taba noliwi kastagwa taba nasinska kasigaden, ta wigawesa ta wmit8gwesa w8banakiwijik. Wmit8gwesa machinab chiga iawigadmab, wig8damob nspiwi wigawesa, wijemisa ta wlakamigwezoma. Agakimzob Académie St-Joseph Odanak ta achi Couvent de Montebello. N8wat, W8banakiak abaznodakabanik msaliwi ta aw8sisak wijokamabanik chiga païabanik wwigw8mikok. Aw8sisak wigi wijokamabanik wlakamigwezomw8 wji wmawiaw8ganw8.

Chiga t8baw8s kas8kaw kasigadmab, Monique losab Molianek wji alokaw8gan. Alokab wji nasinska taba nis kasigaden Service des recherches de Radio-Canada Molianek. Nibaob Georges Ille, nt8wagiz8wawinno wji8ob Hongrie, ta w’waj8n8w8 niswak aw8sisak. Wigob Molianek wji nasinska taba n8lan kasigaden nspiwi wiswiakwa, ta ngwed8mkwaki taba noliwi kasatgwa taba noliwi kasinska kasigadenek, Monique akwalokab ta nawakwab Odanak nspiwi agma.

Kizi wpedgipaïaw8gan, m8jagakimzib wig8damiwi aln8ba8dwaw8gan nspiwi Cécile Wawanolett, m8jagakigamob Odanak achi. Monique mikwalmab chiga waskinnowia, w’nodawab kchaïak chiga aln8ba8dwabanik, nda w’wawtaw8wiabani kanwa w’kzaldamenob wm8mannow8gan ta wwl8dawaow8gan. Ngwed8mkwaki taba noliwi kasatgwa taba noliwi kasinska taba t8baw8s kasigadenek, Cécile Wawanolett m8jahazib Pastonkik, niga Monique m8jagakigamob aln8ba8dwaw8gan.

Monique agakigamob aln8ba8dwaw8gan Odanak wji nis8kaw kasigaden. Wd’awikhamenob nisnol awikhiganal : « Vocabulaire français-abénakis » (1996) ta « Initiation à la grammaire abénakise » (2006). Monique awikhigab ta klozob achi wji iawnol DVD aln8ba8dwaïagakigamow8gan plachm8n8dwaïwi ta iglism8n8dwaïwi liwit8zoak : « Aln8ba8dwada »; w’wlitob ns8zek DVD ta alokab wji wakasigaden.

Monique nda akwagakigamowi, kanwa Philippe Charland, wneg8niagakimzowinnom, agakigamo nikw8bi. Agakigamo aln8ba8dwaw8gan msalto atalagakidimekil alita Institution Kiuna (kchi atalagakidimek aln8baïwi Cégep Odanak). Nis8mkwaki taba noliwi kas8kaw kasigadenek, Kchi Kobalnalskwa Julie Payette w’mildonob anaskam8n Médaille du service méritoire (division civile) wji wd8jidbezikhodw8gan ta wdik8dow8gan aln8baïw8wzow8ganek.

Nikw8bi, Monique wawimat ta noji azwawakat l8dwaw8ganal plachm8n8dwaïwi ta iglism8n8dwaïwi awikhiganal aln8ba8dwaw8ganek.