César Newashish

Manawanik 1902, Atikamekw nitaskinan. Otaskik ki taci nanitawikiw okimaw okosiwaw Seni Newashish acitc wiwa Henriette Dube: Cesar Newashish. Manawanik, nama wiskat ki otci pe nikatam otaski: ki tacikew nac ka matcatc. Mocak sakihewiniw ki wapitahiko onikihiwa: nac kewir kit iti onitcaniciw mitato acitc nicw ki taciriwa, nikotwaso ki nanitawikiriwa kaie nictam ka ki wikimatc Marguerite Moar minowatc nikotwaso ki tariwa onitcaniciwaw kirika Marie Agathe Boivin. Cesar mocak ki wapitahew Atikamekw nehirowisiwa notcimi pimatisiwin kaie notcimi itotiskewin. Kiskeritamopan mitcet atisokaniw, mocak ki takoniw ke aitatisoketc, nama kekocic onikepan. Micta kackitapan nehirowi otamirowiniw.

Nac Cesar kit iti wapitam pitoc e aisparik opimatisiwiniaw kaie arimipiriwin arimeritamowin pimatisiwin. Kit iti wapitam erkam kirowe e nitowertakositcik aka kitci matipitcik nac erkam kirowe onactakiniwok otaskiwaw. Mikowiw omocoma Louis Newashish, ka ki tacikeritci ka ocitaniwok nehirowisiwok ke taciketcik. Omocoma ki micta miro witcihiko opimatisiwinik, wir kaie ki otamirotaw Manawan oteno ka iti takok. Aci weckatc ki otamiro irakonikewinik itekera Ottawa, mitcetaw ki otci nta pamatisiw wikwas tciman kitci apatak kitci miro icaniwok Manawanik.

Cesar ki kiskeritam e mitcirakonikatek nehirowisi aitotiskewin. Arimatc ki kanawapitam kaie ki icaw kitci kispiwatak nehirowisi pimatisiwin kaie nitaskinan. Kaketin ki kispiwatam kimocominok ka ki ici nikatimakok nehirowisi aitotiskewin kaie notcimi pimatisiwin. Mocak ki witam e kicteritakonik nehirowisi pimatisiwin kaie notcimik e pimatisinaniwok, aka kitci onitik kimocominok kokominok ka ki nikatimakok.

Cesar mocak ki kiskeritam kitci kicteritak aski nama osamikam. Kictapitan e kiskinohamasonaniok. Sakitapan e pimotetc notcimik kitci miro kiskerimatc mackikiatikwa. Kicterimepan kaie awesisa. Sakitapan e wapitahatc kaie e kiskinomaketc notcimi pimatisiwin. Okawiwa ki kiskihinomako e tcimankaniwok nama kaie orina mitcetipanak ka tcimanketcik otenamik. Mitato ka piponesitc ka ocitatc nictam tcimancic. Kitci otamirowin e tcimanikaniwok weweritacic aitotcikatew. Mocak ki peikwacin e iti aicinakotatc otcimanikan.

Mocak ki minatcitaw Cesar nitaskinan, aka kitci osamikatek kaskina kekwan ka takok askik. Nac kit iti micta mirowinamok Cesar otamirowin, Bernard Gosselin masinaskohike iriniw. Aka kitci onitik ki ocitaw masinactetcikinicic César et son canot d’écorce 1971 L’Office national du film ka ki ocitatcik. Neta masinactetcikanik nokosiw tan e otci micarik okiskeritamowin e iti aitotak e ocitatc otcimanikan. E natcikohatc mictikwa nac e nasipetcatc sakihikanik. Kice miro otamiro!

Kaskina wec ki kiskerimakiniw Cesar kaskina wec ki icamakan otatisokan mitowi omocoma kaskina wiec e otci micekamak nipi kaie ki icamakan ka ici mamowitonaniwok ka arimotakik pimatisiwin aka kitci onitik nehirosi pimatisiwin. 1985 ki witcihew micta tciman ka ocitakiniwok nicto mitana osit tipahikan ki otci kinowapekaniw, mitcet ki aicitawok kitci kekocica ka ici actek. Kitci nehirowisiw tcimanike iriniw okosa Jean-Louis kirika François kit iti mirew kitci miwotaritci okiskeritamowin, aka wiskat kitci onitik.